«Baýyrjan Momyshuly» telefılminiń resmı treıleri jaryqqa shyqty!
Bul týraly telearnanyń baspasóz qyzmetinen habarlady.
Telefılm jeltoqsan aıynyń on jetisinen bastap «Habar» arnasynan kórsetiledi dep josparlanýda. Atalmysh telefılm «Habar» Agenttigi men rejısser Aqan Sataevtyń táýelsizdik kúnine tartqan syıy bolmaq. Kúni keshe ǵalamtor jelisinde jarııalanǵan telehıkaıanyń resmı treıleriniń ózi myńnan astam kórsetilim jınap úlgerdi.
Fılmniń birinshi maýsymynyń stsenarııin Tımýr Jaqsybaev jazdy. Oǵan Aleksandr Bektiń «Arpalys» atty povesiniń birinshi bólimi negiz bolǵan. Fılmde batalon komandıri retinde urysqa qosylǵan Baýyrjan Momyshulynyń alǵashqy shaıqasy, onyń maıdandas dostarynyń ekiudaı kóńil-kúıi, ózine de, ózgege de talapshyl komandırdiń jaýjúrek minezi týraly baıandalady. Basty ról - M.Áýezov atyndaǵy akademııalyq drama teatrynyń akteri Erkebulan Daıyrovqa buıyrdy. Batyrdyń jary Jamaldyń rólin Ásel Saǵatova, general Panfılovty Vıktor Ashanın, leteınant Qasenovty Saıat Esembaev somdady.
«Bul kez-kelgenniń basyna qona bermeıtin baq qoı, sol baqty baǵalaı bilgen abzal dep oılaımyn. Maǵan senim artqan osy telefılmniń avtory - «Habar» agenttigine Aqan aǵaǵa rahmet aıtqym keledi. Men de osy kisilerdiń senimderin aqtap shyǵýǵa barynsha tyrystym. Shynymdy aıtsam, osy joly Baýkeńniń shyǵarmashylyǵyna, minezine qatty ǵashyq boldym. Kimdi oınap jatqanymdy bilýim kerek qoı. Sondyqtan, Baýkeńdi zertteý barysynda qazaqta osyndaı azamattyń baryna qýandym. Biz onymen maqtanýymyz kerek. Keıingi bizdiń óskeleń urpaqqa úlken tilegim, qulaqtaryna altyn syrǵa Baýyrjannyń kim ekenin bilsin, tanysyn. Negizi, Baýkeńniń boıyndaǵy tunyp turǵan batyrlyq ár qazaqtyń jigitiniń qanynda bar. Sol jurnaq bárinde bar. Eger ol bolmasa, osynshama ulan-ǵaıyr jerdi kezinde bizdiń jigitter alyp qalmas edi», -deıdi basty róldi somdaýshy akter Erkebulan DAIYROV.
Telefılm 4 bólimnen turady
Óndirýshi: «Habar» Agenttigi, Sataifilm
Prodıýseri ári rejısseri: Aqan Sataev
Qoıýshy operator: Hasan Qydyrálıev
Stsenarıı avtory: Tımýr Jaqsylyqov
Kostıým jónindegi sýretshi: Ásel Shalabaeva
Rólderde: Erkebulan Daıyrov, Vıktor Ashanın, Ásel Saǵatova, Saıat Isembaev, Maqsat Sábıtov, Baqtııar Qoja
