Baýyrjan Islamhan Qazaqstan chempıonatynyń úzdik fýtbolshysy atandy
ASTANA. QazAqparat - Almatylyq «Qaırat» pen Qazaqstan quramasynyń jartylaı qorǵaýshysy Baýyrjan Islamhan chempıonattyń úzdik fýtbolshysy atandy, dep habarlaıdy Sports.kz.
Osy máselege baılanysty saýal premer-lıganyń bas bapkerleri men fýtbolshylarynyń arasynda júrgizildi. Qazaqstannyń ótken chempıonatynyń úzdik fýtbolshysy «Qaırat» komandasynyń jáne Qazaqstan quramasynyń 23 jasar jartylaı qorǵaýshysy Baýyran Islamhan boldy.
Almatylyqtardyń lıderleriniń biri osy maýsymdy ótte sátti ótkizdi. Onyń komandasy uzaq ýaqyttar boıy chempıondyqqa umtylyp, kúmis júldege ıe boldy. El chempıonatynda Baýyrjan 17 dop soǵyp, 9 gol salatyn múmkindik jasaǵan. Óz komandasyn kapıtan retinde alańǵa 30 ret alyp shyqty. Bıylǵy jyly 5 matchta oınap, Qazaqstan quramasynyń kóshbasshylarynyń biriniń qatarynda júr. Onyń esebinde 106 upaı bar. Ekinshi orynda «Qaırattyń» 35 jasar shabýyldaýshy jartylaı qorǵaýshysy Andreı Arshavın tur.
Tanymal reseılik legıonerdiń «Qaırat» komandasyna kelýi keıbir jankúıeler úshin keremetteı úmit otyn oıatqan joq. Degenmen, Arshavın almatylyqtardyń qurmetine bólene bildi. Ol 8 dop soǵyp, 7 ret gol salýǵa múmkindik jasady. Andreı Arshavınniń esebinde 96 upaı bar.
Úzdik úshtiktiń qataryn «Ertis» komandasynyń shabýylshysy, 23 jasar Roman Mýrtazaev tuıyqtap tur. Jas shabýyldaýshy pavlodarlyq komandanyń lıderleriniń birine aınaldy jáne komandalastaryn ózimen erte bilip, sonyń nátıjesinde Qazaqstan chempıonatynyń qola júldegeri atandy.
