Baýyrjan Islamhan fýtboldan Qazaqstan birinshiliginiń eń úzdik oıynshysy atandy

Mamandardyń pikirinshe, Baýyrjan Islamhan bıylǵy maýsymdy sátti ótkizgen. Al «Qaırat» komandasy maýsym barysynda chempıondyqqa úmitker komandalardyń biri boldy. Degenmen, sońǵy oıyndarda qarsylastaryna ese jiberip alyp, nátıjesinde qola júldege ıe boldy. Sonymen qatar, almatylyq klýb bıyl Qazaqstan Kýbogyn jeńip aldy. Bıylǵy birinshilikte Baýyrjan barlyǵy 5 gol salyp, áriptesterine 9 ret gol salýǵa múmkindik bergen. Sondaı-aq Baýyrjan bıyl Ulttyq qurama sapynda da táp-táýir óner kórsetti. Ol 6 matchqa qatysyp, qarsylastar qaqpasyna eki gol salǵan. Onyń enshisinde barlyǵy - 166 upaı.

Ekinshi orynda «Astana» fýtbol klýbynyń 28 jastaǵy jartylaı qorǵaýshysy jáne Ortalyq Afrıka Respýblıkasy ulttyq quramasynyń eń úzdik oıynshylarynyń biri - Foksı Ketevoama. Onyń komandasy bıyl el chempıony atandy. Ketevoama barlyǵy 16 gol salyp, chempıonattyń eń úzdik mergen fýtbolshysy jáne áriptesterine 16 ret gol salarlyq oıyn órnegin kórsetip, eń úzdik kómekshi fýtbolshy atandy. Onyń enshisinde - 86 upaı.

Úshinshi orynda «Aqtóbe» fýtbol klýbynyń 30 jastaǵy jartylaı qorǵaýshysy Marat Haırýllın. Komanda bıyl el birinshiliginiń kúmis júldegeri atandy. Ol «gol+pas» júıesi boıynsha 20 upaı jınaqtady. Bıylǵy maýsymnan keıin Marat klýb tarıhynda eń kóp oınaǵan jáne eń kóp gol salǵan fýtbolshy atandy. Ol ári qazaqstandyq klýbtar sapynda Eýropa Kýboktarynda eń kóp oınaǵan oıynshy.

Aıta ketelik, Qazaqstan birinshiliginiń eń úzdik oıynshysy «Sports.kz» portalynyń «Almas» jobasynyń saýalnamasy arqyly anyqtaldy. Bul jobany portal 2011 jyly Qazaqstan birinshiliginiń eń úzdik fýtbolshysyn aı saıyn jáne maýsym saıyn anyqtap turý úshin qolǵa alǵan bolatyn. Ótken jyly «Shahter» klýbynyń shabýylshysy Andreı Fınonchenko eń úzdik oıynshy atansa, 2011-2012 jyldary «Jetisý» (Taldyqorǵan) jáne «Ertis» (Pavlodar) komandalarynda óner kórsetken ózbekstandyq fýtbolshy Ulyqbek Bakaev eń úzdik oıynshy bolyp tanylǵan edi.