Baýyrjan Islamhan «ál-Aın» klýbynda taǵy úsh jyl oınaıdy
NUR-SULTAN. QazAqparat - Qazaqstandyq fýtbolshy Baýyrjan Islamhan Birikken Arab Ámirlikteriniń «ál-Aın» komandasymen kelisimshartqa qol qoıdy, dep habarlaıdy QazAqparat tilshisi.
Bul jóninde klýbtyń baspasóz qyzmeti málim etti.
Kelisimshart aldaǵy úsh fýtbol maýsymyna jasalǵan. Qazaqstandyq fýtbolshynyń komanda quramyna qosylýyna portýgaldyq bapker Pedrý Emanýel qyzyǵýshylyq tanytty.
Aıta keterligi, Baýyrjan Islamhan kelisimshartqa qol qoıýdan buryn BAÁ-degi karantın talabyna sáıkes jeti kúnge oqshaýlandy. Koronavırýsqa baılanysty eki márte synama tapsyrdy. Tolyq medıtsınalyq qadaǵalaýdan ótti.
Baýyrjan Islamhan bıyl 31 qańtarda «Al-Aın» komandasymen maýsym aıyna deıin kelisimshartqa qol qoıǵan edi. Ol on oıynda jasyl alańǵa shyqty. Qarsylastar qaqpasyn bir márte dál kózdep, úsh márte nátıjeli pas berdi. Naýryz aıynda koronavırýs pandemııasyna baılanysty atalǵan memlekette barlyq jarystar toqtatyldy. Keıinnen fýtbol birinshiligi aıaqtalǵany jóninde sheshim qabyldandy.
Endi ol komandadaǵy ázge áriptesterimen birge oqý-jattyǵý jıynyna qatysady. Fýtboldan BAÁ chempıonaty 3 qyrkúıekte bastalady dep josparlanyp otyr.
Baýyrjan Islamhan 1993 jyldyń 23 aqpanynda Taraz qalasynda dúnıege kelgen. Fýtbolshy mansabynda «Taraz», «Astana», «Qaırat», Reseıdiń «Kýban» klýbtarynda oıyn kórsetken.
