Baýyrjan Ibragımov: Sahna kim kóringenniń mekenine aınalǵandyqtan «Baýyrjan-shoý» jumysyn toqtatty

Sóıtsek aǵamyz Almatydan arqa jaqqa qaraı kelgishtep júr eken. Ibragımovtiń bastamasymen «Qazaqstan estrada artısteriniń odaǵy» qurylǵaly jatyr degendi qulaǵymyz shalyp, baıyrǵy satıra artısine birneshe saýal qoıǵan edik, dep jazady yvision.kz saıty (suhbattasqan - Saltanat Súgir).

- Búginde ne kóp, ónerge de basqaǵa da tıesili odaq kóp. Sizderdiń de bir odaq qurýlaryńyz qandaı qajettilikten týyndady?

- Bul odaqty qurýdy 4-5 jyl buryn josparlaǵanmyn. 2009 jyly Almatyda búkil teatrlardy jınap, Ózbekstan, Qyrǵyzstannan qonaqtar shaqyryp, ázil-syqaq qaýymdastyǵyn qurǵan bolatynmyn. Sol kezde memorandýmǵa qol qoıylǵan edi. Sahnadan ketkennen keıin bul is aıaqsyz qaldy. Endi qaıtadan odaq deńgeıinde qolǵa alyp otyrmyz.

- Odaq naqty qandaı jumystarmen aınalysady?

- Odaqtyń maqsaty - ázil-syqaq janrynyń deńgeıin kóterip, eń aldymen qazaq estradasynyń derbes teatryn quryp, onyń memlekettik mártebe alýyna qolǵabys jasaý. Kloýnada, pantamıma, parodııa jáne qýyrshaq teatryn jańa satyǵa kótersek degen nıetten týyndap otyr. Odaq múshelerimen jumyla iske kirisip, qaıtkende de halyqqa bıik deńgeıdegi sapaly týyndylardy dúnıege ákelý kerek. Odaqtyń arnaıy alqasy eń jaqsy qoıylymdy somdaǵan akterge, rejısserlerge Ospanhan Áýbákirov, Serik Kenjeahmetov atyndaǵy júldeler berip, marapattarǵa usynatyn bolady. Sondaı jaǵdaıda talanty bar, tamyr-tanysy joqtardyń, eren eńbekteri eskeriledi. Qala ákimshiligimen birigip, qala kúni qarsańynda ıýmordyń deńgeıi bıikke kóterilgen Ortalyq Azııa, Reseıden ónerpazdar shaqyrylyp, «ıÝrmala» sekildi festıval uıymdastyrý josparda bar. Eskiniń kózin kórgen, ónerdi baǵalaı biletin elimizdiń tanymal mádenıet qaıratkerleri, ázil-syqaq teatr ujymdary bir aýyzdan qoldap otyr.

- Qazir sizdi kóp kórmeımiz. Qandaı ispen aınalysyp júrsiz?

- Daryndy ónerpazdardy daıyndaý qajettigi týyndaǵan soń, Astanada Qazaq ulttyq óner ýnıversıtetinde buryn-sońdy bolmaǵan akter, estrada, mınıatıýra mamandyǵyn ashtym. Byltyr 15 jas órendi qabyldap, endi olardy akterlikke shyńdap jatqan jaıym bar.

- «Baýyrjan-shoý» nege jumysyn toqtatty?

- «Baýyrjan-shoý» jeter shyńyna jetti. Sahnada qoıylatyn ázil-qaljyńnyń kópshiligi jeńil-jelpi bolyp, darynsyzdar kóbeıgen tusta ónerden qol úzýge týra keldi. Kópshiliginiń arnaıy bilimi joq, akterlik mamandyqty ıgermegender qaptap ketkendikten satıra janryn alǵa súıreýdiń ornyna artqa súıredi. KVN-niń birli-ekili jerinde kózge kórinip qalǵandar sahnany bılep aldy. Sahnanyń kıesin umytqan kez boldy. Bul akterlikke nemquraıly qaraǵanymyzdyń kórinisi. Akter estý, kórý, qorqý, baǵalaý degen elementterdi eskergen jón. Myńnyń biri týma talant bolyp jatpasa naqty bilimsiz eshkim ártis bola almaıdy. Obrazy joq anekdottardy aıtýdan, bir-birimizdi keketip-muqatýdan óner shyqpaıdy.

- Ózińiz aıtqan syndarǵa ushyrap júrgenderdiń qataryna «Baýyrjan-shoý» kirmeı me?

- «Baýyrjan-shoý» mamandanǵan týyndylar usynyp, eńbegin sińirdi. Joǵaryda aıtqanymdaı, sahnanyń ózi kim kóringen kirip-shyǵatyn mekenge aınalǵan soń, teatr jumysyn toqtatty. Bıikti baǵyndyrǵan deńgeıinde qaldy. Shetelge elikteımiz dep ulttyq naqyshymyzdy joǵaltyp, «Komedı klab» sekildi anaıy dúnıeler qaptap ketkendikten, barlyǵyn júgendep otyrý úshin basymyzdy qosyp, oılasýdy durys kórip otyrmyn.