Baýyrjan Baıbek: Jyl sońyna deıin Almatynyń qoǵamdyq kólikteri 80% jańarady
ALMATY. QazAqparat - Almaty ákimi Baýyrjan Baıbek qaladaǵy qoǵamdyq oryndardy jańǵyrtý men kóliktik reformany belsendi júzege asyrý sheshiminiń sebepterin túsindirdi, dep habarlaıdy QazAqparat qala ákimdiginiń baspasóz qyzmetine silteme jasap.
Megapolıs basshysy Kanada men Eýropadan kelgen halyqaralyq keńesshilermen birlesip, qalanyń damý qarqynyn baǵalaıtyn zertteý júrgizilgenin atap ótti. Boljanǵan derekterge sáıkes, 2035 jylǵa qaraı aglomeratsııany eseptemegende, Almatyda úsh mıllıon adam ómir súrmek.
«Demek, qazirden bastap, jaıly ómir súrý deńgeıin saqtaý úshin jáne ony jaqsartý úshin ınfraqurylymdy, qoǵamdyq kólikti damytýǵa jáne jańa joǵary bilikti jumys oryndaryn qurýǵa kúsh salý kerek. Qoǵamdyq kóliktiń sanyn tórt esege - 1500-den 6000 avtobýsqa deıin arttyrý qajet. Elektr kóligi men velosıpedterge jáne eń bastysy jaıaý júrginshilerge arnalǵan ınfraqurylymdy damytýdy jalǵastyrý kerek. Sonymen birge, 2035 jylǵa deıin qaladaǵy avtokólikter sanyn osy deńgeıde ustaý mańyzdy.
Eger bul kórsetkishterge qol jetkize almasaq, ekologııa men ómir súrý sapasyn nasharlatyp alamyz. Búgin jasap jatqan barlyq jumystarymyz, sonyń ishinde qoǵamdyq kóliktiń sapasyn arttyrý, trafıkti qaıta bólý - qalanyń odan ári ornyqty damýy úshin jasalýda. Bul júıeli tásil men almatylyqtardyń zor qoldaýyn qajet etetin kúrdeli mindet»,- dep atap ótti qala ákimi.
Qala ákimi bıyl Almatynyń tarıhı ortalyǵynyń taǵy úshten birin qalpyna keltirgen «Halyqqa arnalǵan qala» tujyrymdamasyna toqtaldy.
Jaıaý júrginshiler aýmaǵyn estetıkalyq jáne ekologııalyq jaǵynan kóbirek keńeıtýden bólek, kógaldandyrý alańdary keńeıtilip, jańa sýburqaqtar iske qosylǵan. Energııa únemdeıtin kóshemen jol tóselip, ǵımarattardyń qasbeti jańartyldy. Máselen, bir ǵana Abaı dańǵylynyń boıyndaǵy 200-den astam kafe, meıramhana jáne dúkender jańartylǵan.
«Qalada ázirge uzyndyǵy 500 shaqyrym bolatyn 524 kóshe jóndelgen jáne barlyq jerasty ótkelderin jańartý jumystary aıaqtalyp keledi. Úsh jańa kólik aıyryǵy salynyp, kópirler keńeıtilip jatyr jáne tramvaılar joldary alynyp tastaldy. Jyl sońyna deıin jańa qoǵamdyq kólikter úlesin 80% deıin arttyrý josparlanyp otyr. Ótken jyly 479 jańa avtobýstyń 80% jergilikti bıýdjet esebinen alynsa, bıyl josparlanǵan 569 avtobýstyń 56%-in jeke kompanııalar satyp alýda», - deıdi Baýyrjan Baıbek.
Ótken jyly qalalyq bılik Panfılov, Jibek Joly, Gogol, Qabanbaı batyr, Tólebaev, Baıseıitova kósheleri men Astana alańyn jańartsa, bıyl Abaı, Abylaıhan, Dostyq, Nazarbaev dańǵyldary men Jeltoqsan kóshesi, «Almaty 2» temirjol vokzaly aýmaǵy men Respýblıka Saraıynyń aldyndaǵy alań jóndeý jumystarymen qamtylady.
Jyl sońyna deıin kóshe shamdarynyń úshten biri jańartylady. 24000-nan astam shamdar nemese 31.5% energııany únemdeıtin jáne jaryqdıodty shamdarmen almastyrylady.
