Baýyrjan Baıbek jastarǵa tán bolýy tıis úsh erekshelikti atady
«Qazirgi kezde qarqyn alǵan jahandyq ózgeristerge elimizdiń ár azamaty beıimdele bilýi kerek. Bul rette, jastarǵa artylatyn senim men jaýapkershiliktiń júgi zor. Elbasy aıtqandaı, bizdiń basty úsh qaǵıdatymyz – jaýapkershilik, komandalyq rýh jáne ózimizdiń qundylyqtarymyzǵa berik bolýymyz kerek. Partııa múshelerine arnalyp aıtylǵan bul sózderdi men kez kelgen jastar úshin de temirqazyq bola alady dep esepteımin. Osy oraıda jetistikke jetkisi keletin ár jas osylardy ustanýy kerek», - dedi partııa Tóraǵasynyń birinshi orynbasary.
Sonymen qatar ol qazirgi zamanaýı jastar saıasaty boıynsha mamandardyń basym kópshiligi búgingi kúnniń jas azamatyna tán bolýy tıis úsh erekshelikti bólip kórsetkenine toqtaldy.
Birinshisi - bilimge qushtar bolý. Jańa kásip úırenip, daǵdylaryńyzdy shyńdaýǵa degen umtylys sizderdiń kúndelikti ómir salttaryńyzǵa aınalýy kerek. Zamanaýı jas bir emes, birneshe shet tilin meńgerýi mańyzdy. Ýaqyttaryńyzdy tıimdi paıdalanyp, jastyq shaqtaryńyzdy ózderińizdi damytýǵa arnańyzdar», - dedi ol.
Baýyrjan Baıbek ekinshiden, sportpen shuǵyldanyp, salaýatty ómir saltyn ustanýdyń qanshalyqty mańyzdy ekenin jahandyq pandemııa dáleldep jatqanyn aıtty. Durys ómir saltyn ustanyp, jan men tán saýlyǵyna kóńil bóletin adam ǵana ózin qoǵamnyń tolyqqandy múshesi retinde sezine alatyndyǵyna nazar aýdartty.
«Úshinshi - aınala jurtqa janashyr bolý. Patrıot bolý – jaqynyńa, baýyryńa, elińe, jerińe qamqor bolýdan bastalady. Eline, jerine jany ashıtyn, erekshe mahabbatpen qarap, keleshegine alańdaıtyn urpaq tárbıeleý mańyzdy. Sebebi, bilimdi, deni saý, eli men jerine qamqor jas – elimizdiń gúldenip, kez kelgen syn-tegeýrinnen súrinbeı ótýiniń kepili»,- dedi partııa Tóraǵasynyń birinshi orynbasary.
