Baýyrjan Baıbek Japonııada Tokıo qalasynyń merimen júzdesti
ALMATY. QazAqparat - Jumys saparymen Japonııaǵa barǵan Almaty qalasynyń ákimi Baýyrjan Baıbek kúnshyǵys eliniń isker orta ókilderimen birqatar ekijaqty kezdesýler ótkizip, Tokıo qalasynyń meri ıÝrıko Koıke hanymmen júzdesti, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
Taraptar ınvestıtsııalyq, saýda-ekonomıkalyq salalar jáne qalany odan ári damytý boıynsha yntymaqtastyq máselelerin talqylady.
«Tokıo meri Almatyda ótken dúnıejúzilik qysqy Ýnıversıadanyń joǵary deńgeıin erekshe atap ótti jáne Astanada bolatyn Halyqaralyq EXPO-2017 kórmesine tabys tiledi», - delingen habarlamada.
«Men Almatyda bolǵanmyn, qala maǵan erekshe unady. Sizdiń bul saparyńyz ózara yntymaqtastyqty odan ári nyǵaıtýǵa jańa serpilis beredi degen oıdamyn», - dep atap ótti ıÝ.Koıke.
«Tokyo Seiko MFG» kompanııasy basqarmasynyń tóraǵasy Shıgeto Tanakamen bolǵan kezdesýde Alataý aýdanyndaǵy Indýstrıaldy aımaqta ornalasqan «Tokyo Rope Almaty» metız zaýytyn salý jónindegi jobanyń ekinshi kezegin júzege asyrý máseleleri talqylandy.
«Tokyo Rope» kompanııasynyń Almatyda bolat ónimderin shyǵarýmen aınalysatyn alǵashqy japondyq zaýyty ótken jyldyń qarasha aıynda QR Prezıdenti N. Á. Nazarbaevtyń qatysýymen ótken telekópir barysynda Japonııadan iske qosylǵan edi.
Álemdik reıtıngte 10 úzdik bankter qataryna engen «The Bank of Tokyo-Mitsubishi UFG» basshylyǵymen kezdesý barysynda Baýyrjan Baıbek Almatyda birikken jobalardy júzege asyrýǵa iri qarjy konglomeratynyń qoldaıtyndyǵyna senim bildirdi.
Jol qozǵalysyn basqaratyn Tokıo Ortalyǵynda bolǵannan soń «Smart sıtı» jobasy aıasynda Almatynyń damý Ortalyǵy qala trafıgin basqarýdyń osyǵan uqsas ortalyǵyn qurý úshin saraptamalyq esepteýler júrgizedi. Óz kezeginde «Almaty Sý» holdıngi «YYS International Pte» kompanııasymen birge sýdy tazartýdyń koagýlıantty granýl júıesin júzege asyrady.
Qalalyq ákimdiktiń baspasóz qyzmetiniń habarlaýynsha, Almaty delegatsııasy jumys sapary barysynda saýda, ınvestıtsııa, qyzmet kórsetý boıynsha álemdegi eń tanymal korporatsııalardyń biri «Mitsui&Co.» ofısinde boldy, sonymen qatar «Shimizu» seısmologııalyq kompanııasy zertteý ortalyǵynyń jumysymen tanysty.
