Baýyrjan Baıbek jańa mekteptiń ashylýyna qatysty

Almaty ákimi Baýyrjan Baıbek Naýryzbaı aýdany «Shuǵyla» yqsham aýdanynda №174 jańa qazaq - mektep gımnazııasyn ashty. «Týǵan jer» baǵdarlamasy boıynsha «Sábı» qory salǵan oqý ornynda 1 314 oqýshy bilim alady, 245 bala birinshi synypta oqıdy. Jalpy, búgingi kúni Almatyda mektep partasyna 230 myńnan astam oqýshy otyrdy, olardyń 26 myńy - birinshi synyp oqýshylary.

Almaty ákimi óziniń sózinde Naýryzbaı aýdany qurylǵaly úsh jyldyń ishinde orta mekteptegi oqýshylar sanynyń eki ese ósip,12 myń oqýshyǵa jetkenin aıtty. Oqýshylar ornynyń jetispeýshiligin sheshý úshin 2016 jyly «Nurly jol» baǵdarlamasy boıynsha «Qalqaman» yqsham aýdanynda 900 oryndy № 157 jańa mektep ashylǵan edi. «Aqjar» eldi mekeninde 1 200 oryndy taǵy bir mektep salynýda. Naýryzbaı aýdanyndaǵy eki mektepte nysandardy seısmıkalyq nyǵaıtý jumystary júrýde.

Sapaly bilim berý úshin mektepter zamanaýı fızıka, hımııa, bıologııa, lıngofondy-mýltımedııa kabınetteri men ınteraktıvti taqtalarmen júz paıyz qamtylǵan. Mysaly, Naýryzbaı aýdanyndaǵy jańa mektepte jańa modıfıkatsııadaǵy 10 lıngafondy - mýltımedııaly, fızıka, hımııa, bıologııa kabınetteri, 4 ınformatıka kabıneti jáne eki sport zal bar.

Almaty ákimi oqýshylardy, ata-analardy jańa oqý jylymen quttyqtap, «Rýhanı jańǵyrý» baǵdarlamasy aıasynda  8-10 synyp oqýshylary úshin «Men - óz elimniń patrıotymyn» atty ashyq sabaǵyna qatysty.

«Elbasy óziniń «Rýhanı jańǵyrý» baǵdarlamalyq maqalasynda «Bilim mádenıeti barshamyzǵa ortaq bolýy tıis. Eger baǵalaý júıesinde bilim basty baılyq bolsa, onda ult jetistikke jetedi» degen edi.Bul mindetti oıdaǵydaı júzege asyrý úshin bilim mekemeleri buqaraǵa qoljetimdi, ashyq bolǵany jón»,- dep aıtyp ótti B.Baıbek.

Bıylǵy oqý jylynda «Rýhanı jańǵyrý» baǵdarlamasy aıasynda qalanyń bes mektebinde týǵan ólkeni tarıh, geografııa, mádenıet arqyly bilýdiń ólketaný jónindegi ıntegratsııalanǵan kýrstaryn uıymdastyrý josparlanǵan. Kezdesý barysynda Baýyrjan Baıbek oqýshylarǵa «Qazaqstannyń kıeli geografııasy» tarıhı- mádenı mura jobasy týraly aıtyp berdi. Respýblıkalyq jobaǵa Almatydan «Táýelsizdik tańy», «Táýelsizdik» monýmentteri, «Boraldaı saq qorǵany» arheologııalyq parki, Svıato-Voznesenskıı kafedraldy sobory, Raıymbek batyr kesenesi, Ahmet Baıtursynovtyń mýzeı-úıi engen.

Aıta keterligi, bıyl Memleket basshysynyń jańa Naýryzbaı aýdanyn qurý týraly Jarlyǵyna úsh jyl toldy. Osy kezeń ishinde aýdanda 188 km jol jóndeldi, 64 kóppáterli úı jylý jelisine qosyldy, aýdan gazben 100 paıyz qamtyldy.

Aýdanda 2 mektep, 3 emhana, MJS prıntsıpi boıynsha 33 balabaqsha, 17 sport, balalar alańdary ashyldy.

Qarǵaly ózeniniń 7,7 km jaǵalaýy nyǵaıtyldy, aınalasy abattandyryldy, aýdan turǵyndary úshin jańa demalys orny paıda boldy.

Birneshe kún buryn Naýryzbaı aýdanynyń jańa ákimshilik - iskerlik ortalyǵy ashyldy, munda aýdandyq ákimdik, sot, prokýratýra, HQKO, AHAJ, Qazposhta, bank, zeınetaqy tóleý ortalyǵy, kiris, ádilet basqarmalary jáne basqalary ornalasqan.