Baýyrjan Baıbek jańa avtobýs parkiniń qurylysymen tanysty
«Almaty» áleýmettik kásipkerlik korporatsııasynyń basshysy Muhıt Ázirbaev ákimge Alataý aýdanynda salynyp jatqan avtopark qurylysynyń 60 paıyzy aıaqtalǵanyn baıandady. Qazirdiń ózinde tehnıkalyq qyzmet kórsetý, avtojýý, dıspetcherlik qyzmet, jataqhana nysandary salynǵan jáne bularǵa ishki árleý jumystary júrip jatyr.
Nysan paıdalanýǵa tolyq berilgende 650 jańa jumys orny ashylady. Gazben dánekerleý jabdyqtary satyp alyndy. Qurylysty bıyl jaz aılarynyń basynda aıaqtaý josparlanǵan.
Búgin sondaı-aq, qala basshysy «Batý travel» kompanııasynyń 130 avtobýsqa arnalǵan avtobýs parkiniń qurylysyn aralady. Jobaǵa 1,3 mlrd teńge jeke ınvestıtsııa tartylǵan. Avtopark Alataý aýdanynda boı kóteredi. Sonymen qatar, Indýstrıaldy aımaq mańynda qalanyń qoǵamdyq kóligine qyzmet kórsetetin kásiporyndar klasteri paıda bolady.
Jumys sapary kezinde Baýyrjan Baıbek №99 baǵytty jańartý úshin «CityBus» avtoparki satyp alǵan «Golden Dragon» markaly avtobýstardy kórdi.
Jańa úsh esikti, tómen edendi, kondıtsıonermen, elektrondy tablomen, vıdeo kameramen jabdyqtalǵan ári Evro-5 ekologııalyq standartyna saı avtobýstar osy senbi kúni Áıgerim jáne Kóktóbe eldi mekenderine qyzmet kórsetýge shyǵady.
«Bıznesti damytý úshin biz Almatyǵa bet burdyq, munda naryq úlken ári jaıly ınvestıtsııalyq ahýal ornyqqan, onyń ústine tasymaldaýshylarǵa sýbsıdııa qarastyrylǵan», - deıdi «CityBus» JShS ókili Amangeldi Ábdirahmanov.
Aıta keterligi, Almatyda júzege asqan kólik reformasy barysynda 2018 jyly qala baǵyttary boıynsha 500 jańa avtobýstar júre bastady. Bıyl qalanyń avtobýs parki qosymsha jańaratyn bolady. Sonymen qatar, «Almatyelektrotrans» JShS qarjysy esebinen gazben júretin taǵy 200 jańa avtobýs alynady.
