Baýyrjan Baıbek Twitter-de jeke akkaýntyn ashty

ALMATY. QazAqparat - Almaty qalasynyń ákimi Baýyrjan Baıbek Twitter áleýmettik jelisinde óz akkaýntyn ashty, dep habarlaıdy QazAqparat tilshisi.

Ońtústik Astana basshysy paraqshasynda alǵashqy postyn orys jáne qazaq tilderinde jarııalady.

«Búgin biz qalanyń qoǵamdyq keńes múshelerimen birge birqatar mańyzdy máselelerdi, onyń ishinde týrızmdi damytý jáne Almatynyń ashyq bıýdjetin jańasha qalyptastyrý máselelerin talqylaımyz», - dep jazdy Baýyrjan Baıbek.

Aıta ketý kerek, 28 naýryzda QR Prezıdenti Qasym-Jomart Toqaev Nur-Sultan, Almaty, Shymkent qalalarynyń jáne oblystardyń ákimderi qatysqan keńeste ákimderdiń halyqpen yqpaldastyq formatyn ózgertý úshin áleýmettik jelige tirkelýdi tapsyrǵan bolatyn.

Prezıdent áleýmettik jelilerde belsendi jumys isteý: messendjerlerde toptar qurý, júrgizilip otyrǵan saıasatty jerine jetkize túsindirý, jaǵdaıdy basqara bilý mańyzdylyǵyn aıtqan edi.

Memleket basshysynyń eskertýinen soń óńir basshylary jappaı áleýmettik akkaýnt asha bastady.

Nur-Sultan, Shymkent, Pavlodar, Aqmola, Batys Qazaqstan oblystarynyń ákimderiniń buǵan deıin de Feısbýk jáne Instagram jelilerinde paraqshalary bar bolatyn.

Prezıdent tapsyrmasynan soń Almaty, Soltústik Qazaqstan, Aqtóbe, Túrkistan oblystarynyń basshylary túrli áleýmettik jelilerde jeke paraqshalaryn ashty.