Baýyrjan Baıbek túrkistandyq zııaly qaýym ókilderimen kezdesti

TÚRKІSTAN. QazAqparat - Nur Otan partııasy Tóraǵasynyń birinshi orynbasary Baýyrjan Baıbek barysynda oblys ákimi Ómirzaq Shókeevpen birqatar aýdandardy aralap, óńir turǵyndarynyń muń-muqtajyn tyńdady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Baýyrjan Baıbek qordalanǵan túıitkilderdiń ońdy sheshim tabýyn tikeleı partııa baqylaýyna alatyndyǵyn jetkizdi

Otyrar aýdanyndaǵy Sháýildir aýylynyń turǵyndarymen kezdesý kezinde Sovet zamanynda salynǵan úılerdiń ınjenerlik ınfraqurylymnyń tozyǵy jetkeni jaıly aıtyldy.

«Elbasynyń bastamasymen qolǵa alynǵan «Aýyl – el besigi» jobasynyń aıasynda búginde elimizdiń shalǵaı aýdandarynyń túıitkildi máselelerin sheshý boıynsha partııa júıeli sharalar ázirleýde. Otyrar aýdanyndaǵy Sháýildir aýylynyń turǵyndarymen kezdestim. Munda 300-den astam otbasy 70-80 jyldary salynǵan úılerdegi ınjenerlik ınfraqurylymnyń tozýy saldarynan jylý berý júıesiniń mardymsyz jumysyna baılanysty «Nur Otan» partııasyna shaǵymdanǵan», – dedi Nur Otan partııasy Tóraǵasynyń birinshi orynbasary Baýyrjan Baıbek.

Túrkistan oblysynyń ákimi Ómirzaq Shókeev uzaq jyldardan beri qordalanyp kelgen máseleniń jaqyn arada sheshiletinin aıtty. Jergilikti bıýdjetti naqtylaý kezinde jylý júıelerin salý úshin 700 mln teńgeden astam qarjy bólinbek. Negizgi qazandyqtyń qurylysyna qarajat qaralǵan. Aýyl turǵyndary kótergen máseleni sheshý «Nur Otan» partııasynyń baqylaýyna alyndy.

Jumys sapary barysynda Baýyrjan Baıbek túrkistandyq zııaly qaýym ókilderimen kezdesti. Basqosý barysynda ál-Farabı jáne Abaı syndy oıshyldarymyzdyń mereıtoılaryn taǵlymdy deńgeıde ótkizý jaıy qozǵaldy.

Baýyrjan Baıbek óńirge saparyn Túrkistan qalasynda jalǵastyrdy. Jetekshi partııa Tóraǵasynyń bBirinshi orynbasary «Jastar resýrstyq ortalyǵynda» túrkistandyq qoǵam belsendileri men jastarmen erkin formatta kezdesip, pikir almasty. Jıynda azamattyq qoǵamdy damytý men jastar saıasaty jáne bıylǵy eriktiler jylyn júzege asyrý jaıly máseleler aıtyldy.

Sondaı-aq, Baýyrjan Baıbek Q.A. ıAsaýı atyndaǵy Halyqaralyq qazaq-túrik ýnıversıteti mádenıet saraıynda partııanyń Túrkistan oblystyq fılıaly tóraǵasynyń birinshi orynbasary Beısen Tájibaev pen elimizdiń Bas parııasynyń aýdandyq fılıal tóraǵalarynyń qatysýymen jınalys ótkizdi.

Eske sala keteıik, Elbasy tapsyrmasy boıynsha Nur Otan partııasy birneshe aıdan beri Úkimetpen jáne óńirlik fılıaldarmen birlese otyryp, aldaǵy 5 jylǵa aýdandardy, qalalardy jáne oblystardy damytýdyń jańa baǵdarlamasyn ázirleý jumystyn júrgizip jatyr. Atalǵan baǵdarlamalarda árbir jekelegen óńirdiń jergilikti erekshelikteri eskerilip, azamattardyń naqty qajettilikteri kórinis tabatyn bolady.