Baýyrjan Baıbek turǵyndar tarapynan jıi kóteriletin máseleler týraly aıtty
ALMATY. QazAqparat - Almaty ákimi Baýyrjan Baıbek búgin ınnvatsııalyq forým barysynda qala bıligine turǵyndardyń jıi aıtatyn synyna jaýap berdi, dep habarlaıdy QazAqparat tilshisi.
«Men alǵash ákim bop kelgende bárine syn aıtatynmyn. Qazir máselemen egjeı-tegjeıli tanysa kele, munyń bári qanshalyqty qıyn ekendigin túsine bastadym. Biraq qazir aıtylyp jatqan syn da burynǵydan kóp emes. Tek ákimdik qalalyqtarǵa ashyq, qoljetimdi bola bastady. Qazir turǵyndar tarapynan senim artyp kele jatqandyǵyn aıta alamyn. Instagramdy alsaq... basynda qansha adam senimsizdik bildirdi. Qazir onda 150 myń turaqty qoldanýshy bar. Men televızor qaramaımyn. Internetti arasynda úzilis bolǵan kezde oqyp turamyn»,- dedi ákim.
Qala basshysy turǵyndardy alańdatatyn basty taqyryptardy atady. Onyń aıtýynsha, qalalyqtar ekologııa men kólik máselesine alańdaýly.
«Ekologııa máselesi mańyzdy. Jasalyp jatqan jumystyń bári ony jaqsartýǵa baǵyttalǵan. Joldardy aqyly ete almaımyz. 300 myń adam Almaty oblysynan qatynap jumys jasaıdy. Olardyń barlyǵy oblystyq bıýdjetke túsetin salyqtyń 75 paıyzyn berip otyr. Sondyqtan, osy faktordy eskere otyryp, syrttan keletinderge joldy jaba almaımyz», - dedi Baýyrjan Baıbek.
Ákimniń aıtýynsha, qaladaǵy barlyq JES gazǵa kóshirilip jatyr. Sondaı-aq, 300 jańa avtobýs satyp alýǵa 11 mlrd teńge bólingen.
«Tramvaı toqtamaıdy. Naqtyraq aıtqanda, eski tramvaıdyń ornyna jeńil relsti transport keledi. Metro joldary uńǵylanyp jatyr. Halyqtyń 15 paıyzy metromen qatynaıdy», - dedi ákim.
