Baýyrjan Baıbek Tatarstannan kelgen delegatsııa ókilderimen júzdesti
ALMATY. QazAqparat - Almaty qalasynyń ákimi Baýyrjan Baıbek Tatarstannyń jańashyl top ókilderin «Almaty Innovations - 2017» forýmyna qatysýǵa shaqyrdy, dep habarlaıdy «QazAqparat» HAA.
«Almaty Innovations - 2017» forýmy 30 maýsym kúni ótedi jáne ol qalalyq ınnovatsııalardy engizýdi talqylaý alańyna aınalady. Tatarstan Respýblıkasy prezıdenti apparat jetekshisiniń orynbasary Igor Savelevpen kezdesý barysynda Almaty qalasynyń ákimi ınvestıtsııalyq yntymaqtastyqty nyǵaıtý máselesin sóz etti. Tatarstan delegatsııasynyń ókilderine Alataý aýdanyndaǵy ındýstrııaldy aýmaq pen «Jańa ınnovatsııalyq tehnologııalar parki» erkin ekonomıkalyq aýmaǵynyń múmkindikteri usynyldy.
Tatarstan Respýblıkasy prezıdenti apparaty basshysynyń orynbasary Qazan qalasynan 40 km qashyqtyqta ornalasqan «Innopolıs» ınnovatsııalyq ortalyǵynyń tájirıbesi týraly aıtyp berdi. «Innopolıs» joǵary tehnologııalyq salalardy tartýdy qarastyrady. Sonymen qatar ortalyqtyń aıasynda ataýy bir erekshe ekonomıkalyq aımaq jumys isteıdi. Kezdesý barysynda Igor Savelev Almaty men Tatarstannyń joǵary tehnologııalar salasynda yntymaqtastyǵynyń áleýeti zor ekendigin aıtty.
«Men Almatyǵa birinshi ret kelip turmyn jáne bul qala maǵan qatty áser etti. Qalanyń myqty energııasy, kásibı rýhy aıqyn seziledi. Bizge shaǵyn jáne orta bıznesti damytý, startaperlerdi qoldaý, «Aqyldy qala» jobasyn júzege asyrýǵa degen jergilikti kózqaras qatty unaıdy»,-dedi Savelev.
Kezdesýdiń qorytyndysy boıynsha, yntymaqtastyqtyń naqty baǵyttary men jaýapty adamdar aıqyndaldy. Sonymen qatar quzyrly mekeme ókilderinen delegatsııa jiberip, tájirıbe men tehnologııalardy zerdeleý jóninde kelisildi.
