Baýyrjan Baıbek sýburqaqtardy qalpyna keltirýdi tapsyrdy
ALMATY. QazAqparat - Almaty ákimi Baýyrjan Baıbek Abaı, Abylaı han, Jeltoqsan, Nazarbaev dańǵyldaryn aralaý barysynda jumys istemeıtin sýburqaqtardy qalpyna keltirýdi tapsyrdy, dep habarlaıdy QazAqparat tilshisi.
Budan bólek qala basshysy tıisti basqarmalary men kommýnaldyq qyzmetine júrginshi aımaǵy men jaıaýjoldardy ulǵaıtýdy, jasyl jelekti túzeýdi, tarıhı ǵımarattardyń syrtyna ejelgi kelbetin qaıtarýdy tapsyrdy.
«Qalanyń tarıhı ortalyǵyn jańartý - taıaý arada atqarylatyn úlken jumystardyń basy ǵana. Qazir biz asfalt, túrli qurylys nysandaryn, ózi ádemi bolǵanymen syrtyna túsiniksiz nárseler japsyrylǵan ǵımarattardy kórip júrmiz. Ár kvartal, árbir kóshe jóndelip, retke keltiriledi. Almatynyń burynǵy tartymdylyǵyn qaıtaratyn ýaqyt jetti», - dedi Baýyrjan Baıbek.
Almaty ákimi kúrdeli jóndeýden ótetin birqatar jer asty ótpeli joldardy aralap kórdi. Baýyrjan Baıbek jol jóndeý kezinde jaıaý júrginshiler úshin qaýipsiz qozǵalysty qamtamasyz etýdi tapsyrdy.
Bıyl Memleket basshysynyń Joldaýy aıasyndaǵy megapolısti jańǵyrtý jáne «Almatyny damytýdyń 50 draıveri» jobasy aıasynda qalanyń tarıhı ortalyǵyn jańartý odan ári jalǵasady. Ǵımarattardyń syrty jańaryp, júrginshi aımaqtary keńeıedi.
Aıta ketý kerek, bir apta buryn Baýyrjan Baıbek aıaqjoldardyń boıynda túrli qurylys júrgizip, jaıaý júrginshilerge kóp kedergi keltiretin tulǵalardy anyqtaý jóninde tapsyrma bergen edi.
Bıyl qalada uzyndyǵy 155 shaqyrym bolatyn 157 kóshe jóndeledi. Maqataev, Baıtursynov jáne Jarokov kóshelerindegi tramvaı joldary alynady. Jol jıegin jóndeý barysynda trotýarlar abattandyrylyp, aryq naýalary almastyrylady.
