Baýyrjan Baıbek SMM mamanyn daıyndaýǵa qarjy surady - Úkimet otyrysy
ASTANA. QazAqparat - Búgin Úkimettiń selektorlyq rejimdegi otyrysynda Almaty qalasynyń ákimi Baýyrjan Baıbek áleýmettik jelilerdiń marketıng mamanyn daıyndaýǵa bıýdjet qarjysyn surady, dep habarlaıdy QazAqparat.
«Ónimdi jumyspen qamtý jáne jappaı kásipkerlikti damytý baǵdarlamasyn júzege asyrý maqsatynda aǵymdaǵy jyly shamamen 5 mlrd teńge qarastyrylǵan. Qysqa merzimdi kásibı oqytý baǵdarlamasy boıynsha Almaty qalasy josparyn mamyr aıynda Eńbek mınıstrligi jyl basynda 14 esege úlǵaıtyp, 6975 adamǵa jetkizdi. 30 maýsymda 1,2 mlrd teńge bólindi. Biz 20 uıymnan 102 kásip boıynsha tyńǵylyqty irikteý júrgizip, tizimin bekittik. Oqý baǵdarlamasy Almatynyń kásipkerler palatasymen kelisilgen. 1 tamyzynda 699 adam oqyp jatyr. Tamyz aıynyń basynda oqýǵa qosymsha 500 adam jiberildi. Osylaısha, qazirgi ýaqytta 17 paıyzy bilim alýda», - dedi ol.
Onyń aıtýynsha, Almatyda «Jastardy qoldaý jol kartasy» bastalyp, aǵymdaǵy jyl Jastar jyly dep jarııalanǵan. Búginde ońtústik astanada bos oryndar jármeńkesi nátıjesinde iriktep alynǵan 5 myń adamnyń tizimi bar. Onymen jumyspen qamtý basqarmasy aınalysýda. 15 qyrkúıekke deıin kontıngent tolyqtaı jasaqtalyp, jyl sońyna deıin jospar oryndalady.
«Sonymen qatar qysqa merzimdi kásiptik oqytýlar tek jumysshy mamandyqtaryna daıyndaýdy qamtıtyndyǵyn atap ótkim keledi. Bul kásipter tizimin tarylta túsedi. Al Almaty ekonomıkasynyń 80 paıyzdan astamyn qyzmet kórsetý salasy quraıtyndyǵyn eskere kele Sizden baǵdarlama qatysýshylarynyń aıasyn jáne talap etiletin mamandyqtar tizbesin keńeıtý múmkindigin qarastyrýda suraımyz. Biz Almaty bıznesimen tyǵyz jumys isteýdemiz jáne baǵdarlamada eskerilmegen mamandyqtarǵa qatysty suranystar túsip jatady. Máselen, olardyń qatarynda halyqaralyq sapa júıesiniń menedjeri, áleýmettik jelilerdiń marketıng mamany, áleýmettik qyzmetker syndy mamandyqtar bar. 1 tamyzdaǵy jaǵdaı boıynsha 11160 adam nemese jospardyń 64,4 paıyzy, onyń 79 paıyzy turaqty jumys ornynan ornalasty», - dedi Baýyrjan Baıbek.
