Baýyrjan Baıbek senbilikte qyzǵaldaq badanalaryn otyrǵyzdy
ALMATY. QazAqparat - Almatyda ótken jalpyqalalyq senbilikte QR Tuńǵysh Prezıdentiniń saıabaǵynda 50 túp aǵash otyrǵyzyldy, 30 myńǵa jýyq qyzǵaldaq egildi, sondaı-aq 20 qyrǵaýyl men 10 tıin jiberildi, dep habarlaıdy QazAqparat.
Sharaǵa belgili sportshylar, qoǵam qaıratkerleri, estrada juldyzdary, jastar birlestikteriniń ókilderi, memlekettik qyzmetkerler, densaýlyq saqtaý qyzmetiniń ókilderi, PIK-ter, mektep oqýshylary, kolledjder men JOO stýdentteri qatysty.
Jalpyqalalyq senbilikke 250 myńnan astam adam shyqty.
«Búgin senbilik aıasynda QR Tuńǵysh Prezıdentiniń saıabaǵynda 50 túp aǵash otyrǵyzyldy. Sonyń ishinde Ońtústik Amerıkada ósetin 5 «qyzǵaldaq aǵashy» bar. Aǵashtar shamamen 5 jyldan keıin gúldeıdi jáne olar qyzǵaldaqtarǵa uqsas bolyp keledi», - dedi «Grın Land» JShS basshysy Gúlzada Qaldybaeva.
Senbilikte 50 myń qyzǵaldaq: 30 myńy QR Tuńǵysh Prezıdentiniń saıabaǵynda, qalǵany Ortalyq mádenıet jáne demalys saıabaǵynda egildi. Gúlderdi egý sharasyna Almaty ákimi Baýyrjan Baıbek te qatysty. 
Sonymen qatar qorshaýlardy,týrnıketterdi, oryndyqtar men qoqys jáshikterin syrlaý jumystary júrgizildi. Qala boıynsha 1010 kóshet otyrǵyzý kózdelgen. Qoqysty shyǵarý úshin 600 birlik arnaıy tehnıka tartyldy.
