Baýyrjan Baıbek oqýshylardyń «qozǵalyssyz» ómirine alańdaýly
ALMATY. QazAqparat - Búgin Almatyda bilim berý salasy mamandarynyń tamyz keńesinde qala ákimi Baýyrjan Baıbek oqýshylardyń densaýlyǵy úshin alańdaıtynyn aıtty, dep habarlaıdy QazAqparat tilshisi.
«Qazir balalar kóp qozǵalmaıdy. Kóp ýaqytyn telearna aldynda ótkizedi. 1 qyrkúıekten bastap sportpen aınalysýǵa barynsha mán beretin bolamyz. Maǵan oqýshylardyń omyrtqalary qısaıyp, kózderiniń kórý jitiligi tómendep bara jatqany jaıly jıi baıandalady», - dedi ákim.
Óz sózinde ákim amerıkalyq ýrbanısttiń pikirin jetkizdi.
«Amerıkalyq oqýshylardyń arasynda dıabet dertiniń kóbeıýiniń basty sebebi «qala qurylysynyń durys josparlanbaýynan» deıdi keıbir ǵalymdar. Óıtkeni, oqýshylarǵa jaıaý júrýge múmkindik joq», - dedi ákim.
Onyń aıtýynsha, qalanyń tarıhı ortalyǵyn jańǵyrtý jumystary oqýshylar men ata-analary úshin jasalyp jatyr.
«Jaıaý júrginshilerge arnalǵan aımaqtyń paıda bolýy adamdardy gadjetterden bas alyp, dıvannan turýyna yqpal etedi. Bul óz kezeginde deni saý urpaqtyń, otbasylyq qundylyqtardyń qalyptasýyna septigin tıgizedi», - dedi Baýyrjan Baıbek.
Aıta ketý kerek, Almatyda kóktem bastalǵaly beri qalanyń tarıhı ortalyǵynyń úshten-bir bóligi qaıta jasalyp jatyr.
Qabanbaı batyr, Panfılov, Jibek joly, Gogol kósheleri men «Astana» alańy qaıta jóndeldi.
Qabanbaı batyr kóshesiniń eki jaǵynan Tólebaev pen Abylaıhan kósheleriniń arasyna birneshe kún ishinde tas tóseý jumystary aıaqtalady. Gogol kóshesi boıynda jasyl jelekti sýaratyn júıe tartylýda, Qaldaıaqov pen Jeltoqsan kósheleriniń arasyna tas tóseý qyrkúıektiń basynda iske asady.
«Astana» alańynda qozǵalys jolaǵy azaıǵan, qurǵaq fontandardy montajdaý jumystary júrip jatyr. Tas tóseý de aıaqtalyp qaldy. Alań qyrkúıek aıynyń basynda ashylady.
Qalada barlyq magıstraldy kóshelerdegi joldarǵa ortasha jóndeý jumystaryn júrgizý aıaqtaldy. Qyrkúıektiń basynda Asqarov kóshesiniń boıyndaǵy sý qubyrlaryn jáne Qazybek bı, Mámetova, Masanchı kósheleriniń boıyndaǵy ýchaskelerde jylý júıelerin qaıta jasaý jumystary qyrkúıekte aıaqtalady. Sonymen qatar, 14,7 km aryq júıesi, 57 kóshedegi 42,2 km aryq júıesi qaıta jasalýda.
