Baýyrjan Baıbek: «Nur Otan» partııasynyń saıasatyn oryndaýǵa bar kúsh-jigerimdi salamyn
«Qurmetti almatylyqtar! Ózim týyp-ósken Almatyǵa qyzmetke kelgenim kúni keshe ǵana sekildi edi. Mine, 4 jyl óte shyǵypty. Osy kezeńde súıikti qalamyzǵa aıanbaı eńbek ettim. Kóptegen jobalardy birlese iske asyrdyq. Maǵan úlken senim artyp, Almatynyń ákimi etip taǵaıyndaǵan Elbasy Nursultan Ábishuly Nazarbaevqa alǵysym sheksiz. Atqarylǵan árbir ıgi is Elbasynyń zor qoldaýymen iske asty. Sondaı-aq, Prezıdent laýazymyna kiriskennen únemi qoldaý bildirip, Almatyǵa arnaıy kelip, metro jáne jolaıyryqtar qurylysynyń qarqynyn údetýge, qosylǵan aýdandarda ınfraqurylymdy damytýǵa qoldaý kórsetken, saılaýdan keıin meni qaıta taǵaıyndaǵan Kasym-Jomart Kemeluly Toqaevqa úlken alǵys bildiremin», - dep jazdy B. Baıbek Instagram-daǵy paraqshasynda.
Osy oraıda ol qala ákimi qyzmetine kirise sala «Nur Otan» partııasynyń basymdyqtary negizinde «Almaty-2020» baǵdarlamasyn ázirlep, ol qoǵammen tikeleı talqylanǵanyn, jospar oıdaǵydaı iske asyp jatqanyn jetkizdi. «Qala adamdar úshin» kontseptsııasy aıasynda birqatar kósheler jańǵyrtyldy, óndiris oshaqtary ashyldy, ekonomıka órkendep, aýqymdy ınvestıtsııalar tartyldy.
«Qyzmetimizdiń úlken bir baǵyty ulttyq rýhty kóterý boldy. Elbasy qoldaýymen ıÝNESKO aıasynda Almatynyń 1000 jyldyǵyn atap ótip, qalamyzdyń ótkeninen syr shertetin «Almaty mýzeıin» ashtyq. Osylaısha, Almatynyń myńjyldyqtar buryn babalar salǵan altyn besik, atajurt ekenin aıshyqtadyq. Ulttyq ónerimizdi dáripteıtin halyqaralyq sharalar uıymdastyryp, birqatar óner ordalaryn ashtyq. Endi búgin qarapaıym azamattardyń muńyn muńdap, joǵyn joqtap, ózekti máselelerdi kóterip kele jatqan halyq pen bıliktiń arasyndaǵy dáneker - «Nur Otan» partııasy Tóraǵasynyń birinshi orynbasary qyzmetine taǵaıyndaldym. El tarıhyndaǵy osynaý jaýapkershiligi mol tusta senim artyp otyrǵan Elbasyǵa úlken alǵys aıtamyn. Halyqtyń memleketke jáne erteńgi kúnge degen senimin arttyrýǵa, el birligin nyǵaıtýǵa, ıaǵnı Elbasy baǵdaryn iske asyrýǵa baǵyttalǵan partııa saıasatyn oryndaýǵa bar kúsh-jigerimizdi jumsaıtyn bolamyz. Barshańyzǵa yqylasymdy bildire otyryp, denderińizge saýlyq, otbasylaryńyzǵa amandyq tileımin!», - dedi ol.
Eske sala keteıik, osyǵan deıin Almaty qalasynyń ákimi qyzmetin atqarǵan Baýyrjan Baıbek, búgin «Nur Otan» partııasy Tóraǵasynyń birinshi orynbasary bolyp taǵaıyndaldy.
.
