Baýyrjan Baıbek Nur Otan-nyń saılaýaralyq kezeńdegi mindetterin atady
Baýyrjan Baıbektiń aıtýynsha, Nur Otan Májilis pen barlyq deńgeıdegi máslıhattar saılaýynda jeńiske jetken kúnnen elge bergen ýádeni naqty oryndaýǵa kirisip ketken kórinedi. Árbir oblys, qala jáne aýdan boıynsha 217 jol kartasy bekitilip, olardyń oryndalýyn júıeli baqylaý úshin 14 respýblıkalyq jáne 1738 óńirlik qoǵamdyq keńes qurylǵan. Oǵan depýtattardan bólek belgili qoǵam qaıratkerleri men sarapshylar, jýrnalıster kirgen.
«Partııa lıderi Nursultan Nazarbaev qoıǵan mindetterge sáıkes elektorataralyq kezeńde ortalyq apparattyń qurylymy ońtaılandyrylyp, elimiz boıynsha partııanyń qoǵamdyq qabyldaý bólmeleri men fılıaldary halyqpen ózara is-áreket jasaýdyń proaktıvti formatyna kóshti. Elbasy aıtqandaı, Nur Otan «bir orynda turyp qalmaı», árdaıym jetilip otyrýy kerek. Partııa belsendi azamattyq ustanymy, kreatıvti ıdeıalary men jobalary bar adamdardy biriktirip, qoldaýy tıis», - deıdi Baýyrjan Baıbek.
Ol, sondaı-aq, partııaishilik praımerız Nur Otan partııasyn júıeli túrde qaıta jandandyrýdyń negizgi elementi boldy dep esepteıdi.
«Elektorataralyq kezeńde partııanyń kadrlyq áleýetin kúsheıtý boıynsha jumystar belsendi túrde jalǵasýda. Ótken aptada oblystar, qalalar men aýdandardyń barlyq ókildi partııa organdaryna saılaýy aıaqtaldy. Nur Otan saıası keńesteriniń quramy óńirlerde 51%-ke jańartyldy. Áıelderdiń úles sany 29-dan 35%-ke, 35 jasqa deıingi jastar – 11-den 22,5%-ke deıin ósti. Memlekettik qyzmetshilerdiń úlesi 2 esege, ıaǵnı 18-den 9%-ke deıin tómendedi. Úshten birinen astamy – úkimettik emes uıymdardyń ókilderi, jýrnalıster, blogerler, kásipkerler, sondaı-aq aýyl sharýashylyǵy men ónerkásip qyzmetkerleri. Árbir ekinshi adam – ótken praımerızdiń qatysýshysy», - deıdi partııa tóraǵasynyń orynbasary.
Baýyrjan Baıbektiń oıynsha, Nur Otan-nyń búkil bastaýysh partııa uıymdarynyń 4517 basshysyn saılaý partııanyń quramyn jańartýdaǵy taǵy bir eleýli qadam bolǵan. Daýys berý qorytyndysy boıynsha «bastaýysh partııa uıymdary» basshylarynyń 20%-i jańarsa, qalǵan 80%-y senim mandatyn rastaı alǵan.
«Nur Otan-nyń mindeti – tıimdi partııalyq-saıası kún tártibin qalyptastyrý jáne jergilikti jerlerde partııalyqtardyń jumysyn túbegeıli túrde kúsheıtý. Búgingi kúni barsha nurotandyqtardy el Prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn tıimdi iske asyrýǵa jumyldyrý mańyzdy. Atap aıtqanda: ózekti máselelerdi ashyq talqylaý, halyqpen «keri baılanysty» kúsheıtý, azamattyq bastamalardy qoldaý, sondaı-aq bıýdjet qarajatyn jumsaýdyń tıimdiligi men ashyqtyǵyna júıeli monıtorıng júrgizý jáne basqa da máselelerdi qamtıdy», - dep jazdy ol paraqshasynda.
Nur Otan partııasy tóraǵasynyń orynbasary nurotandyqtardyń Elbasy ataǵan basty úsh qaǵıdaty – jaýapkershilik, komandalyq rýh, partııa ıdealdary men qundylyqtaryna beriktik ekenin eske salady.
«Biz mejelengen josparlar men bergen saılaýaldy ýádelerimizdiń barlyǵyn judyryqtaı jumyla otyryp, birge júzege asyratynymyzǵa senimdimin. «Nur Otan» – naqty isterdiń partııasy. Qıyndyqty eńserip, jeńiske birge jetemiz», - deıdi Baýyrjan Baıbek.
