Baýyrjan Baıbek: Nur Otan-nyń mindeti – aýyldardyń damýyna júıeli jaǵdaı jasaý

NUR-SULTAN. QazAqparat – «Nur Otan» partııasy Tóraǵasynyń birinshi orynbasary Baýyrjan Baıbek Facebook-tegi paraqshasynda aýyl ákimderiniń tikeleı saılaýyna bıleýshi partııadan qatysatyn kandıdattardyń daıarlyǵy týraly aıtyp, «Ózgerister joly: Ár azamatqa laıyqty ómir!» saılaýaldy baǵdarlamasyn júzege asyrýdyń aralyq nátıjelerimen bólisti.

Onyń aıtýynsha, keshe barlyq aımaqta «Nur Otan»-nan 587 kandıdat tirkelgen. Úmitkerlerdiń 35%-ten astamy – jańa tulǵalar, onyń ishinde bilim berý salasynyń ókilderi, kásipkerler, fermerler jáne t.b. bar. Olardyń kópshiligi – taıaýda ótken partııaishilik praımerızdiń qatysýshylary, bastaýysh partııa uıymdarynyń tóraǵalary. Kandıdattardyń ortasha jasy – 46 jas. Áıelder – 11%, 35 jasqa deıingi jastar – 14%.

«Ózderińizge málim, el Prezıdenti Qasym-Jomart Kemeluly Toqaevtyń bastamasy boıynsha 25 shildede tuńǵysh ret aýdandyq mańyzy bar qalalardyń, aýyldar men kentterdiń jáne aýyldyq okrýgterdiń ákimderin tikeleı saılaý ótedi. Memleket basshysy atap ótkendeı, «aldaǵy saılaý – saıası júıemizdiń kemeline kelgeniniń belgisi ǵana emes, sonymen birge qoǵamymyzdyń demokratııalyq damý jolyna nyq qadam basqanyn bildiredi». «Nur Otan»-nyń mindeti – tek saılaýda jeńiske jetý ǵana emes, aýyldardyń damýyna júıeli jaǵdaı jasaý, azamattardyń naqty máselelerin sheshý. Partııa óz kandıdattaryn usyna otyryp, birinshi býyn ákimderdiń el Prezıdenti usynǵan «Halyq únine qulaq asatyn memleket» tujyrymdamasy aıasynda halyqpen ózara árekettestiginiń jańa mádenıetin qalyptastyra otyryp, zamanaýı tásilderdi endirýde», - dedi Baýyrjan Baıbek.

Sondaı-aq, Baýyrjan Baıbek óz jazbasynda «Nur Otan» parlamenttik saılaýlardan keıin birden saılaýaldy ýádelerin iske asyrýǵa belsendi túrde kiriskenine erekshe toqtaldy. Saılaýdan keıingi mindetterge oraı búkil qajetti partııalyq ınfraqurylym jańasha qaıta qurylymdanǵany aıtylady.