Baýyrjan Baıbek: Naǵyz patrıot bolsań, terińdi tógip eńbek et

NUR-SULTAN. QazAqparat - Qazaqstan ózge eńsesi bıik eldermen terezesi teń tursyn deseń, naǵyz patrıot bolsań, terińdi tógip eńbek et! Qaı salanyń tizginin ustasań da, naǵyz maman bol! «Jastar Otanǵa!» saıası lagerine arnaıy kelgen «Nur Otan» partııasy tóraǵasynyń birinshi orynbasary Baýyrjan Baıbek osylaı aıtty, dep habarlaıdy QazAqparat tilshisi.

Partııa baspasóz qyzmetiniń málimetinshe, jastarmen ótken beıresmı kezdesý barysynda Baýyrjan Baıbek olardy tolǵandyryp júrgen túrli suraqtarǵa jaýap berip, óziniń ómirlik tájirıbesimen bólisti. Ol óz sózinde Partııa Lıderi, Elbasy Nursultan Nazarbaev «Qazaqstannyń bolashaǵy – búgingi jastar» dep jas býynǵa úlken senim artyp otyrǵanyn jetkizdi.

«Elbasy partııaǵa el bolashaǵyna shyn jany ashıtyn, belsendi jastardy toptastyrýdy, olarǵa arnap áleýmettik lıft quryp, jas býyndy tolǵandyratyn eń ózekti máselelerdi sheshýdi tapsyrdy. Sonymen qatar, El Prezıdenti Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynda jastarǵa beriletin bilim sapasyna aıryqsha nazar aýdarylyp otyr. «Dıplommen – aýylǵa» baǵdarlamasynyń aıasyn keńeıtip, jumysty jańa deńgeıde jalǵastyrý úshin Prezıdent Úkimetke osy baǵdarlamany qarjylandyrýdy 20 mlrd  teńgege jetkizýdi tapsyrdy«, - dedi Baýyrjan Baıbek. 

Qazirgi tańda «Jas Otan» 2020 jylǵa deıingi «Jastar Otanǵa!» jastardyń tabysqa jetý joly» baǵdarlamasynyń júzege asyrylýyn egjeı-tegjeıli taldaý jumystary júrgizilýde. Alǵashqysy tolyqtaı qorytyndylanǵannan keıin 2025 jylǵa deıingi jańa baǵdarlama jasalady. Jastar qanatynyń qoldanystaǵy Jarǵysyna sáıkes jańa baǵdarlama kelesi jyldyń kókteminde «Jas Otan» Jastar qanatynyń V sezinde qabyldanady.

«Nur Otan» partııasy tóraǵasynyń birinshi orynbasary jastar qanatynyń negizgi mindeti – elimizdiń barlyq aımaqtaryndaǵy qurdastaryna partııanyń jastar saıasatyn, «Jas Otan»-nyń jobalaryn iske asyrýdaǵy jańa tásilderdi jetkizý, sondaı-aq, 2025 jylǵa deıingi jańa baǵdarlama úshin usynystar jınaý jáne olardy talqylaýdy uıymdastyrý ekenin atap ótti.

Óz kezeginde lagerge kelgen jastar qoǵamdyq qundylyqtar, jataqhana, jumysqa ornalasý, áleýmettik jelilerdiń yqpaly jáne bala tárbıesi, otbasylyq qundylyqtarǵa qatysty oılarymen bólisip, saýaldaryn qoıdy.

«Memleket jastarǵa qoldaý kórsetýdi jalǵastyra beredi. Ol úshin ártúrli mehanızmder jasalyp ta jatyr. Degenmen, jastar kez kelgen jetistikke eń aldymen ózi tabandylyq tanytyp, talmaı eńbek etkende ǵana jetýge bolatynyn túsinýi tıis. Kedergiler adamnyń óz basynda. Naqty maqsat qoıyp, alǵa umtylý kerek jáne jańa nárselerdi jasaýdan, kópshiliktiń synyna ushyraýdan qoryqpaý qajet. Eńbek etemin degen adamǵa elde jumys jetkilikti. Biliksiz zańger bolǵansha, myqty dánekerleýshi bolǵan durysyraq emes pe? Eger adam shyn máninde tabysty bolýdy qalap, sol jolda tabandylyq tanytsa, nátıjege qol jetkizetini anyq. Ózindik oıy bar, tyń bastamalardan qoryqpaıtyn, eńbekqor adamǵa óz elimizde de múmkindik kóp. «Nur Otan»-nyń qatarynda elge shyn jany ashıtyn, eldiń erteńin jaqsy jaqqa ózgertýge qulshynǵan azamattar bolýy kerek«, - dedi partııasy tóraǵasynyń birinshi orynbasary.

Aıta keteıik, «Jas Otan» jastar qanatynyń muryndyq bolýymen 2009 jyldan bastaý alǵan «Jastar Otanǵa!» respýblıkalyq jastar saıası lageri osymen qatarynan on birinshi ret uıymdastyryldy. Bıyl bul shara Aqmola oblysyndaǵy «Baldáýren» oqý-saýyqtyrý ortalyǵynda 4-9 qyrkúıek aralyǵynda ótti. Onda elimizdiń túkpir-túkpirinen kelgen 170-ke jýyq belsendi jas ózara tájirıbelerimen almasyp, túrli semınar, trenıngter men trend-sessııalarǵa jáne sporttyq, oıyn-saýyq sharalaryna qatysty.