Baýyrjan Baıbek Mysyrdyń Joǵarǵy Konstıtýtsııalyq sotynyń tóraǵasymen kezdesti
ALMATY. QazAqparat - Almaty ákimi Baýyrjan Baıbek Mysyrdyń Joǵarǵy Konstıtýtsııalyq sotynyń tóraǵasy Abdel Vahab Abdel Razekpen kezdesti, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
Taraptar saýda- ekonomıkalyq jáne mádenı- gýmanıtarlyq baılanystardy nyǵaıtý máselelerin talqylady.
«Búgingi kúni Almaty álemniń damyǵan 600 megapolısteriniń qataryna engen, bizdiń qalamyz sapaly servıs pen qyzmettiń, óńirlik qarjynyń ortalyǵy, munda zań turǵysynda ınvestorlar úshin barlyq jaǵdaılar jasalǵan. Mysyr azamattarynyń qalaǵa, ásirese týrızmge qatysty iskerlik belsendiligi arta túsedi dep oılaımyn», - dedi Baýyrjan Baıbek.
Óz sózinde Egıpettiń Joǵarǵy Konstıtýtsııalyq sotynyń tóraǵasy Abdel Vahab Abdel Razek Qazaqstandaǵy sońǵy konstıtýtsııalyq ózgeristerdi joǵary baǵalady.
«Eki eldiń ózderine ǵana tán tarıhy bar, biraq qandaı jaǵdaıda da baılanys úzilmeıdi. Meniń búgingi saparym Qazaqstannyń basty zańdy qujatyna ózgeris enýimen tuspa-tus kelipti. Qazaqstan Respýblıkasynyń Prezıdenti N.Á.Nazarbaevtyń ózi azamattardyń quqy men bostandyǵyn nyǵaıtýǵa baǵyttalǵan ózgeristerdi engizýdiń bastamashysy bolǵandyǵy qýantady. Bul - ózge memleketterge jaqsy úlgi. Mańyzdy qujatty talqylaýǵa almatylyqtardyń belsendi túrde qatysqanyn bilemiz ári qabyldanǵan ózgeristerdiń Qazaqstannyń barlyq azamattarynyń júreginen laıyqty oryn alǵandyǵyna senimdimiz», - dep atap ótti Egıpettiń Joǵarǵy Konstıtýtsııalyq sotynyń tóraǵasy.
Kezdesý barysynda egıpettik tarap Almaty ákimin Mysyrǵa resmı saparmen kelýge shaqyrdy.
Aıta keteıik, 2016 jyly Almaty qalasy men Egıpet arasyndaǵy taýar aınalymy 14,5 mln. AQSh dollaryn qurady, qalada 12 birikken jáne 16 mysyrlyq kásiporyn tirkelgen.
