Baýyrjan Baıbek kólik turaǵyna aınalǵan trotýardy qalpyna keltirýdi talap etti
ALMATY. QazAqparat - Almaty ákimi Baýyrjan Baıbek qalanyń birqatar kóshelerin aralap shyqty, dep habarlaıdy QazAqparat tilshisi.
Qala basshysy Qaldaıaqov kóshesiniń shyǵysyna qaraı Gogol men Áıteke bı kóshesi arasyndaǵy trotýardy qalpyna keltirýdi tapsyrdy. Onyń aıtýynsha, munda nysannyń menshik ıeleri jaıaý júrginshilerge kedergi keltiretin kólik turaǵyn jasap alǵan.
«Tıisti basqarma qoǵamdyq aımaqty kólik turaǵyna aınaldyrǵan Abdýllın men Gogol kósheleri buryshyndaǵy qurylysty salyp jatqandarǵa shara qoldansyn. Jaıaý júrginshilerge basymdyq bere otyryp atalǵan aımaqty kóriktendirý jumystaryn qurylys kompanııasy óziniń jeke qarjysy esebinen atqarýy kerek» - dedi qala ákimi Baýyrjan Baıbek.
Aǵymdaǵy jóndeý jumystary kezinde Gogol kóshesi boıymen Sh.Qaldaıaqov kóshesinen Ortalyq mádenıet jáne demalys parkine deıin abattandyrý júzege asyrylady. Sonymen qatar, júrginshi qozǵalysyn qıyndatatyn zańsyz qurylystardyń barlyǵy alynady.
Aıta keterligi, buryn Sh.Qaldaıaqov kóshesinen Jeltoqsan kóshesine deıingi ýchaske jóndelgen edi.
Bıylǵy jazda Almatyda 150-den astam kóshe, 30 km trotýar men 600 aýla qaıta jasalady. Jerasty ótpeli joldardyń barlyǵynda kúrdeli jóndeý júrgizilip, jańa fontandardy salý josparlanǵan.
Buryn qaıta jasalǵan Panfılov, Jibek Joly, Gogol, Qabanbaı batyr, K.Baıseıitova, M.Tólebaev kósheleri men «Astana» alańynan ózge qalanyń birqatar negizgi dańǵyldary jańarady.
Araılym Joldasbaı
