Baýyrjan Baıbek Qoǵamdyq keńes músheleriniń árqaısysyna eskertkish ornatýdy usyndy

ALMATY. QazAqparat - Almatyda QR Din isteri jáne azamattyq qoǵam mınıstri Darhan Káletaev pen qala ákimi Baýyrjan Baıbektiń qatysýymen Qoǵamdyq keńes otyrysy ótti. Jıyn barysynda  azamattyq qoǵamdy damytýǵa arnalǵan «Belsendi megapolıs» jol kartasy qabyldandy, dep habarlaıdy QazAqparat tilshisi.

«Búgingi azamattardyń qoǵamǵa belsene aralasýyna, jastar saıasatyn júrgizýge, dinı ekstremızmmen kúreske jumyldyrýǵa baǵyttalǵan «Belsendi megapolıs» birlesken jobasy qabyldandy. Bul Din isteri jáne azamattyq qoǵam mınıstrligi men Almaty arasyndaǵy aýqymdy qujat. Elbasy aıtqandaı, azamattyq qoǵam rólin arttyrý 100 naqty qadam ınstıtýtsıonaldyq reformasyn júzege asyrý jolyndaǵy ult jospary maqsattarynyń biri. Osy maqsatta  elimizde qoǵamdyq keńes quryldy», - dedi Baýyrjan Baıbek.

Qala ákimi qoǵamdyq keńes sarapshylar pýly ekenin atap ótti.

«Qoǵamdyq keńes naǵyz mamandardyń birigýinen quraldy. Olar kez kelgen aqparatpen qarýlanǵan. Qoǵamdyq keńes tipti Almatydaǵy máslıhat depýtattarynan da kóp jumys jasaıdy. Osy otyrǵandardyń bárine kóz tirisinde eskertkish qoıý kerek. Óıtkeni, olar altyn ýaqyttaryn qıyp, Almatynyń kórkeıýi úshin jalaqysyz jumys istep jatyr», - dedi B.Baıbek.

«Almaty - azamattyq qoǵamnyń dińgegi, ortalyǵy. Elimizdegi 5 qoǵamdyq uıymnyń 1-i Almatyda tirkelgen. Olar tek Almaty emes, respýblıka deńgeıinde jumys istep jatyr. Mınıstrlik azamattyq qoǵam ınstıtýttarymen birlestikti arttyrý baǵytynda birqatar jumystar atqaryp jatyr. Almatyda 206 myń stýdent bar eken. Olar - otanymyzdyń bolashaǵy. Elbasynyń rýhanı jańǵyrý baǵdarlamasy Almatyda eń joǵarǵy deńgeıde júrgizilip jatyr», - dedi D. Káletaev.

Aıta ketý kerek, «Belsendi megapolıs» baǵdarlamasy azamattyq qoǵam, din jáne jastar salasyndaǵy memlekettik saıasatty iske asyrýdy, yntymaqtastyqty arttyrýǵa baǵyttalǵan.

Atalǵan qujattyń úzdik tájirıbeleri elimizdiń basqa da óńirlerinde engiziletin bolady.