Baýyrjan Baıbek Kemerovodaǵy qaıǵyly jaǵdaıǵa baılanysty kóńil aıtty
ALMATY. QazAqparat - Almaty ákimi Baýyrjan Baıbek qaladaǵy Reseı Federatsııasynyń Bas konsýldyǵynda boldy. Qala basshysy «Zımnıaıa vıshnıa» saýda-oıyn saýyq ortalyǵyndaǵy alapat órt saldarynan qurban bolǵandardyń týystary men jaqyndaryna kóńil aıtty dep habarlaıdy Qazaqparat tilshisi.
Ol Kemerovoda 25 naýryzda bolǵan qaıǵyly jaǵdaı birde - bir qazaqstandyqty beıjaı qaldyrmaǵanyn atap ótti.
«Barlyq qazaqstandyqtar sııaqty men de Kemerovo qalasynda órt saldarynan adamdardyń qaza tapqany týraly habardy zor kúızelispen qabyldadym. Orny tolmas aýyr qaıǵyǵa ortaqtasa otyryp, Almaty qalasy turǵyndary men jeke ózimniń atymnan marqumdardyń týystary men jaqyndaryna kóńil aıtamyn. Óz kezeginde zardap shekkenderdiń barlyǵyna tezirek saýyǵyp ketýdi tileımin», - dedi Baýyrjan Baıbek.
Aıta ketý kerek, Reseıdegi qaıǵyly jaǵdaı kezinde qaza tapqandardy eske alý úshin qala turǵyndary Almatydaǵy Reseı Federatsııasynyń Bas konsýldyǵy ǵımaratyna gúl shoqtary men balalar oıynshyqtaryn ákelýde.
Sonymen qatar, Almaty ákimi qalanyń barlyq saýda-oıyn saýyq ortalyqtaryn, bazarlardy, vokzaldardy, mektepter men aýrýhanalardy, bala baqshalardy jáne jurt kóp jınalatyn oryndardy órt qaýipsizdik máselesi boıynsha tekserýden ótkizýdi tapsyrǵan bolatyn. Monıtorıng nátıjesinde kemshilik anyqtalǵan uıymdarǵa tıisti sharalar qoldanylady.
