Baýyrjan Baıbek: Qazaqstandyq birlikti odan ary nyǵaıtý qajet
ALMATY. QazAqparat - Almaty jurty 1 mamyr - Qazaqstan halqynyń birligi kúnin keń kólemde atap ótýde. Almatydaǵy Respýblıka saraıy aldynda qurylǵan basty sahnada otandyq jáne Ázerbaıjan, Tatarstan, Ózbekstannan kelgen ónerpazdar án shyrqap, bı bıledi. Basty sahnada almatylyqtar men qala qonaqtaryn quttyqtaǵan shahar basshysy Baýyrjan Baıbek álemge úlgi bolyp otyrǵan qazaqstandyq birtektilikti odan ary nyǵaıtý qajettigin aıtty, dep habarlaıdy QazAqparat tilshisi.
«Barshańyzdy elimizdegi dostyq pen tatýlyqtyń, ashyq aspan men beıbit ómirdiń merekesi 1 mamyr - Qazaqstan halqynyń birligi kúnimen shyn júrekten quttyqaımyn. Byltyr biz el táýelsizdiginiń 25 jyldyǵyn keńinen atap óttik. Elbasy atap ótkendeı, qazaqstandyqtar - birtutas ult. Qazaqstandyq birtektilikti odan ary nyǵaıtý qajet. Barlyq etnostarǵa ózderiniń ónerlerin jańǵyrtýǵa, ádet-ǵuryptarymen dástúrin saqtaýǵa, damytýǵa jáne ana tilderin oqytýǵa múmkindik jasaldy. Memleket basshysynyń kóregendiligimen osydan 22 jyl buryn qurylǵan Qazaqstan halqy Assambleıasy el birligin nyǵaıtýda balamasy joq ınstıtýt ekenin dáleldedi. ««Qol ustas, birigip, tize qos!» dep Sáken jyrlaǵandaı, biz barshamyz birigip tize qosyp eńbek etemiz dep senemin», - dedi Baýyrjan Baıbek.
Búgingi mereke «Qazaqstan bizdiń ortaq úıimiz» dep atalatyn 300 bıshi qatysqan horeografııalyq kompozıtsııamen ashylyp, kórermendi shattyqqa bóledi. Ásirese, ulttyq bıler men shetelden kelgen qonaqtar sahnanyń ajaryn kirgizdi.
Ázerbaıjannan kelgen ánshi Naılıdiń oryndaýyndaǵy «Meniń halqym» áni men ózbekstandyq ánshi Lobar Zahodıevanyń oryndaýyndaǵy «Rýmolım» áni kórermen jurtty tánti etti. Qaırat Nurtastyń oryndaýyndaǵy «Jasa, Qazaqstan» áni jastar qaýymyn serpiltip tastady.
Búgingi mereke almatylyqtar úshin keshke deıin jalǵasady. Keshqurym Týretskıı horynyń ujymy qazaq tilindegi kompozıtsııalardy oryndamaq.
