Baýyrjan Baıbek «Qaırat» komandasyna jańa maýsymda sáttilik tiledi (FOTO)
ALMATY. QazAqparat- Búgin Almatyda «Qaırat» fýtbol klýbynyń basshylyǵy jańa maýsymǵa baılanysty baspasóz máslıhatyn jáne ashyq jattyǵý sharasyn ótkizdi.
Jańa maýsym qarsańynda komandada birqatar aýys-túıister oryn aldy.
Odan basqa, biregeı Footbonaut trenajeri resmı túrde paıdalanýǵa berildi. Mundaı trenajer álemde birneshe fýtbol klýbynda ǵana bar eken.
Sonymen, bıyl komandanyń bas jattyqtyrýshysy bolyp reseılik maman Aleksandr Borodıýk taǵaıyndaldy. Al komanda quramy qaqpashy Andreı Sıdelnıkov, qorǵaýshy Lýkash Tesak jáne jartylaı qorǵaýshy ıAn Vorogovskımen tolyqty. Búgingi sharaǵa qatysqan qala ákimi Baýyrjan Baıbek komandaǵa jańa maýsymda sáttilik tiledi.
«Biz «Qaırat» komandasyn qashanda maqtan tutamyz. «Qaırat» - shyn mánisinde halyqtyq komanda. Elbasynyń salıqaly saıasatynyń arqasynda elimizde sporttyń damýyna barynsha jaǵdaı jasalýda. Qalada buqaralyq sportty qarjylandyrý 20 esege artty. Biz ótken jyldyń ishinde 100-den astam balalar alańqaıyn ashtyq. Bıyl taǵy 150 alańqaı paıdalanýǵa beriledi. «Qaırattyń» jattyǵý bazasynda fýtbolshylardy maýsymǵa sapaly turǵyda daıyndaý úshin barlyq jaǵdaı jasalǵan. Jankúıerler súıikti komandasyna qyzý qoldaý kórsetedi. Sondyqtan, jańa maýsymda «Qaırat» komandasyna sáttilik tileımin», - dedi qala basshysy.
Aıta ketelik, jańa maýsym aıasynda aldaǵy 8 naýryzda Astanada «Qaırat» pen «Astana» komandalary kezdesedi. 
