Baýyrjan Baıbek qaladaǵy kompıýterlik klýbtardy tekserýdi tapsyrdy
ALMATY. QazAqparat - Almaty ákimi Baýyrjan Baıbek halyq aldynda esep berý barysynda negizgi baıandamasynan soń turǵyndardy alańdatqan suraqtarǵa jaýap bere bastady, dep habarlaıdy QazAqparat tilshisi.
Qala turǵyny ákimnen kompıýterlik klýbtardyń jumysyn shekteýdi ótindi.
«Búginde bizdiń balalarymyz gadjetten kóz almaıdy. Olardy kompıýterlik oıyndardan basqa eshnárse alańdatpaıdy. Árıne, biz olardy úıde shekteýge tyrysamyz. Biraq olar ashyq turǵan kompıýterlik klýbtarǵa barady! Nege klýb ıeleri balalarǵa tún jarymyna deıin oınaýǵa ruqsat beredi? Olardy bireý baqylaı ma?» - dedi turǵyn.
«Qazirgi tsıfrlandyrý zamanynda bul negizgi problema. Balalardyń kóz janary nasharlap, omyrtqasy qısaıady. Ár adam óziniń balasynyń qaıda júrgenin qadaǵalaýy kerek. Bir jaǵynan sizben kelisemin. Bizdiń jergilikti polıtsııa qyzmeti qaıda qarap otyr? Baqylaýdy kúsheıtý kerek. Balalarǵa ishimdik beretinin-bermeıtinin anyqtaý kerek», - dedi Baıbek.
Ákimniń aıtýynsha, qazir qalada mundaı mekemelerdi tekserý bolyp turady. Biraq ata-analardyń narazylyǵy basylar emes.
«Endeshe tekserý, klýb ıelerinen talap etý kerek. Kim bar kásipkerlik basqarmasynan? Olar talapty oryndamasa, zańdy buzsa, jazalaý - shart. Qala boıynsha tekserý júrgizińizder», - dedi ákim.
