Baýyrjan Baıbek qala mektepteriniń jer silkinisine tózimdiligin tekserdi
ALMATY. QazAqparat - Almatyda birqatar oqý nysandaryn seısmıkalyq nyǵaıtý jáne kúrdeli jóndeýden ótkizý jumystary aıaqtaldy, dep habarlaıdy QazAqparat tilshisi.
Almatyda bıyl alǵash ret qaladaǵy 28 oqý nysany ǵımaratynyń jer silkinisine tózimdiligin kúsheıtý maqsatynda seısmıkalyq nyǵaıtý jumystary júrgizildi. Naqtyraq aıtqanda, 22 mektep pen alty bala baqsha ǵımaraty retke keltirildi.
Qalalyq ákimdik baspasóz qyzmetiniń habarlaýynsha, bıyl megapolıste eki mektep pen alty balabaqsha salynady. Sonymen qatar, alty mektep pen bir bala baqsha ǵımaraty jódelip, olardyń janynan qosalqy nysandar salynady.
Búgin Almaty ákimi Baýyrjan Baıbek seısmıkalyq nyǵaıtý, kúrdeli jóndeý jumystary júrgizilgen birqatar mektep pen bala baqshalardy aralap kórdi.
«Qazirgi kezde №71, №106, №53, №63-shi tórt mektepte jáne №69 ı №80 eki bala baqshada seısmıkalyq nyǵaıtý jumystary aıaqtalǵan. Sondaı-aq, qyrkúıekte №10 mektepte jáne №77,№82 eki bala baqshada atalǵan baǵyttaǵy jumystardy aıaqtaý josparlanǵan. Al, №187, №192, №4, №162, №19, №118, №101 jeti mektepte qazan aıynda, №20, №104, №130, №94, №21, №110 alty mektepte qarashada, «Úmit úıi» men №46 mektepte jeltoqsan aıynda seısmıkalyq nyǵaıtý jumystary aıaqtalady», delingen Almaty qalasynyń Qurylys basqarmasy taratqan málimette.
Qalada mektep jasyna deıingi jeti balalar mekemesinde qurylys jumystary júrýde. Mysaly, №110 mektep janynan bala baqsha salynady, №6 bala baqsha janyndaǵy qosalqy nysannyń qurylysy bıyl bitedi. Kelesi jyly №184, №185 mektepter janyndaǵy bala baqshalar, Naýryzbaı jáne Alataý aýdandarynda árqaısysy 320 oryndy úsh bala baqsha paıdalanýǵa beriledi.
Qazirgi ýaqytta Bilim berýdiń segiz nysanynda qurylys-montaj jumystary júrýde. Jyl aıaǵyna deıin №77 jáne №156 mektep janyndaǵy qosalqy nysandar qurylystary aıaqtalady. 2018 jyly Naýryzbaı aýdnynda 1200 oryndy, Alataý aýdanynda 600 balaǵa arnalǵan mektep, №1 Pedagogıkalyq kolledj ben №151, №185 janynan salynǵan qosalqy nysandar iske qosylady.
Aıta keterligi, sońǵy 5 jyl ishinde qalada 15 myń orynǵa arnalǵan 280 bala baqsha,14 myń oryndyq 12 mektep ashyldy.Tek ótken jyly ǵana jergilikti bıýdjet esebinen 500 oryndy 4 bala baqsha iske qosyldy. «Shańyraq»,«Qalqaman» yqsham aýdandarynda mektepter janyna 1800 oryndy qosalqy nysandar salyndy.
Memlekettik-jeke áriptestik aıasynda 2016 jyly jeke qarjylar esebinen 5,7 oryndy 175 bala baqsha men mını-ortalyqtar ashyldy. 2017 jyly 200 oryndy 57 jeke bala baqsha paıdalanýǵa berildi. Bıznes tarapynan jasalǵan qoldaý arqasynda 14 mlrd. teńge bıýdjet qarjysy únemdeldi.
«Sońǵy 2 jyl ishinde ınvestorlar esebinen 7 myń oryndy 54 bala baqsha salý jóninde sheshim qabyldanǵan. 3 myń oryndy 24 bala baqsha kommýnaldyq menshikke beriledi. Osynyń arqasynda bıýdjettiń 24 mlrd teńge qarjysy únemdeldi», delingen ákimdiktiń habarlamasynda.
Almatyda 2 myń orynǵa arnalǵan 4 jataqhana salý josparlanǵan. 1200 oryndy taǵy bir jataqhananyń qujattary daıyndalýda. «Turǵyn úı qurylys jınaq»bankimen birge jastardyń jeńildetilgen zaem arqyly jańa páter alýyna múmkindik beretin erekshe baǵdarlama jasaldy.
