Baýyrjan Baıbek qala kóshelerin aralap, birqatar tapsyrma berdi
ALMATY. QazAqparat - Almaty ákimi Baýyrjan Baıbek qalanyń kólik jáne jaıaý júrginshiler joldaryn aralap kórdi. Bul týraly QazAqparat qalalyq ákimdiktiń baspasóz qyzmetine silteme jasap habarlaıdy.
Megapolıs basshysy birneshe saǵat ishinde Abaı, Baıtursynov, Asqarov, Gagarın kóshelerin aralap, olardy odan ári abattandyrý boıynsha birqatar tapsyrmalar berdi.
«Mamyrdyń sońyna deıin Gagarın dańǵylyn Ál-Farabıden Tımırıazev kóshesine deıingi joldardy qaıta jasaý aıaqtalady. Uzyndyǵy úsh shaqyrymnan asatyn jańarǵan jolmen qatar jaıaý júrginshiler trotýarlary abattandyrylyp, aryq jelileri salynady. Paıdalanylmaıtyn konstrýktsııalar men zańsyz qurylystar buzylyp, sonan soń kóshelerdi kógaldandyrý josparlanǵan. Júrginshilerdiń qaýipsizdigin qamtamasyz etý úshin kólik turaqtary, dańǵyl jıegindegi trotýarlar qalpyna keltirilýde. Turǵyndardyń talabyn eskere otyryp, Gagarın men Qojabekov kósheleriniń qıylysyna baǵdarsham ornatý múmkindigi qarastyrylýda. «Baykonyr» bıznes-ortalyǵy aldyndaǵy júrginshi aımaǵy keńeıip, kólik turaǵy jińishkeredi»-delingen ákimdiktiń habarlamasynda.
Sondaı-aq, Almaty ákimi Baıtursynov kóshesin aralaǵan kezde zańsyz salynǵan dámhananyń jazǵy terrasyn alyp tastap, júrginshi ýchaskesin qalpyna keltirýdi tapsyrdy.
Avtory: Araılym Joldybaeva
