Baýyrjan Baıbek Elbasyna hat jazǵan QazMZÝ túlegine partııa bıletin tapsyrdy
Sondaı-aq ol «Adal bilim» jobasy aıasynda Sybaılas jemqorlyqqa qarsy is-qımyl agenttiginiń qoldaýymen júzege asyrylyp jatqan jobalarymen tanysty, dep habarlaıdy QazAqparat tilshisi.
Oqý ornynyń rektory Talǵat Nárikbaevtyń aıtýynsha, búginde sybaılas jemqorlyq táýekelderin tómendetý masqatynda ýnıversıtettiń barlyq qyzmetteri onlaın túrde qoljetimdi.
«2014 jyly biz stýdentter «bir tereze» qaǵıdatymen qyzmet ala alatyn ortalyq ashqan edik. Qazirgi ýaqytta biz odan ary da ilgerilep, qyzmetterdi elektrondy formatta kórsetemiz. Soǵan oraı ákimshilik shyǵystar da qysqaryp, jańa alańdar bosady. Ol jerde zamanaýı kovorkıng ortalyǵyn jasadyq. Mobıldi qosymsha da ázirledik. Onyń kómegimen stýdent jataqhanaǵa ótinim berip, oqý qunyn eseptep shyǵara alady jáne edvaızerge keńes alýǵa jazylady», - dedi oqý ornynyń basshysy.
Baýyrjan Baıbek jastarmen kezdesý barysynda «Nur Otan» partııasynyń kóshbasshysy – Elbasy Nursultan Nazarbaevtyń bastamasymen partııany júıeli jańǵyrtý boıynsha júrgizilip jatqan jumystar men Sybaılas jemqorlyqqa qarsy is-qımyl baǵdarlamasynyń júzege asyrylý barysy jaıynda aıtyp berdi. Sonymen qatar zań ýnıversıtetiniń stýdentterimen Memleket basshysy Qasym-Jomart Toqaevtyń Qazaqstan halqyna Joldaýyndaǵy sot jáne quqyq qorǵaý júıesin reformalaý, jemqorlyqpen júıeli kúres, azamattardyń quqyqtaryn qorǵaý jáne ózge de usynystary talqylandy.
«Tsıfrlandyrý – bul jemqorlyqqa qarsy is-qımyl men ony túp-tapyrymen qurtýdyń, usynylatyn qyzmetterdiń ashyqtyǵy mensapasyn arttyratyn mańyzdy tetikterdiń biri. Ýnıversıtette stýdentterge oqytýshyny tańdaýǵa, jasyryn túrde oǵan baǵa berýge barlyq jaǵdaı jasalǵan. Bul óte mańyzdy. Sebebi jastar belgili bir sheshimder úshin jaýapkershilikti túsinýi tıis. Biz ásirese joǵary oqý oryndaryndaǵy jemqorlyqqa qarsy is-qımylǵa basa mán berip otyrmyz. Óıtkeni, eger adam jas kezinen ádiletsizdikpen betpe-bet kelse, onda onyń ómirge degen teris kózqarasy qalyptasady», - dedi Baýyrjan Baıbek.
Kezdesý sońynda «Nur Otan» tóraǵasynyń birinshi orynbasary ýnıversıtet rektory Talǵat Nárikbaev pen partııa qataryna qosylǵysy keletindigin aıtyp, Elbasy Nursultan Nazarbaevqa hat jazǵan atalǵan JOO-nyń túlegi Erlan Tólegenovke partııalyq bılet tabys etti.
