Baýyrjan Baıbek: Elbasy usynǵan jeti tuǵyr – «Máńgilik El» bolýǵa bastaıtyn naqty qaǵıdattar
Dúbirli dýmanda sóz alǵan «Nur Otan» partııasy tóraǵasynyń birinshi orynbasary Baýyrjan Baıbek el Táýelsizdiginiń mán-mańyzy men ult mádenıetin órkendetýdegi yqpalyna keńinen toqtaldy.
«Biz qysqa ýaqytta ǵasyrǵa tatıtyn joldy júrip óttik. Tuńǵysh Prezıdent – Elbasy Nursultan Ábishuly Nazarbaevtyń basshylyǵymen qol jetken tabystarymyz orasan. Eń bastysy, Táýelsizdigimizdiń tuǵyryn nyǵaıtyp, eldigimizdi ornyqty ettik. Memlekettilikti baıandy eter aýqymdy ister jolǵa qoıyldy. Aıtystyń ulttyq óner retinde saqtalýy, rýhanııatymyzǵa erkin jol ashylýy da – Táýelsizdiktiń arqasy. Elbasy Nursultan Ábishuly ýaqytynda «Mádenıet – ulttyń bet-beınesi, rýhanı bolmysy, aqyl-oıy, parasaty» dep atap kórsetip, órkenıetti ult óziniń tól mádenıeti arqyly ǵana basqa elderge tanylatynyn aıtty. Táýelsizdik alǵan sátten bastap ult mádenıetine udaıy qamqorlyq tanytyp, memlekettik qoldaý kórsetti. Arnaıy «Mádenı mura» baǵdarlamasyn usynyp, onyń aıasynda qanshama qundy jádigerler, jazba derekter jınaqtalyp, rýhanı qazynamyzdy baıytty, kóptegen mádenı oshaqtar jańǵyrtyldy. Elbasynyń bul aýqymdy jobasy keıinnen «Rýhanı jańǵyrý», «Uly Dalanyń jeti qyry» baǵdarlamalaryna ulasqanyn Ózderińiz jaqsy bilesizder. Jaqynda Elbasymyz «Eldiktiń 7 tuǵyry» atty qaǵıdattar jınaǵyn jarııalady. 30 jyldyq damýdy qorytyndylaǵan, keler urpaqqa amanat retinde aıtylǵan bul Jeti tuǵyr – «Máńgilik El» bolýǵa bastaıtyn naqty qaǵıdattar», – dedi Baýyrjan Baıbek.
Sondaı-aq ol «Nur Otan» partııasynyń saıası tuǵyrnamasynda «qazaq tilin, mádenıet pen dástúrdi damytý – strategııalyq basymdyǵy» ekendigi naqty kórsetilgenin alǵa tartty.
Sonyń aıasynda partııa ulttyq mádenıetke, ónerge, onyń ishinde aıtysqa basymdyq berip, udaıy qoldaý kórsetip keledi.
Ulttyq qundylyqtar baǵytyndaǵy is-sharalar «Ulttyq mura» partııalyq jobasy aıasynda toptastyrylyp, júıelendirilgen.
Partııanyń saılaýaldy baǵdarlamasy aıasynda bıyldyń ózinde 200-ge jýyq mádenıet nysanyna jóndeý jumystary júrgizildi.
Jyl basynan beri «Nur Otan»-nyń qoldaýymen elimizde 49 aqyndar aıtysy ótti.
Táýelsizdikke qol jetkenge deıin jáne el egemendigin alǵan alǵashqy onjyldyqtaǵy qıyn kúnderdi aǵa býyn jaqsy biletinine toqtalǵan partııa tóraǵasynyń birinshi orynbasary eń basty qundylyǵymyz – Táýelsizdikti nyǵaıtý úshin eldiń birligi men turaqtylyq kerek ekenin basa aıtty.
Mádenıet jáne sport mınıstri Aqtoty Raıymqulova mınıstrlik tarapynan ulttyq ónerdi qoldaý baǵytynda atqarylyp jatqan irgeli ister men bolashaq jobalary týraly aıtty.
«Kıeli merekemizdiń qarsańynda elordamyzda eki kún boıy ótkiziletin asyl qazynamyz, aqyndardyń jyr dodasyna qosh keldińizder! Ǵasyrdan ǵasyrǵa jalǵasyp kele jatqan halqymyzdyń kıeli aıtys ónerin qurmettep, jańǵyrtý, ony keıingi jas urpaqtyń sanasyna sińirý – bizdiń mindetimiz. Halyqtyń rýhanı qazynasyna aınalǵan búgingi jyr dodasy – aqyndardyń talantyn shyńdaıtyn úlken óner jarysy. Bıylǵy Táýelsizdigimizdiń 30 jyldyǵy, jyr alaby Jambyl atamyzdyń 175 jyldyǵy sııaqty aıtýly merekeler aqıyq aqyndarymyzdyń shyǵarmalaryna shabyt qosyp, salmaqty da, oıly sózdermen óriledi degen senimdemin. Búginde mádenıet salasynda da tól ónerimizdi, ulttyq mádenıetimizdi saqtap, keıingi urpaqqa mıras etý baǵytynda úlken jumys atqarylyp jatyr», – dedi mınıstr.
Óz kezeginde, bıyl mereıli jetpis jasqa tolyp, aıtystyń abyzy atanǵan Júrsin Erman el Táýelsizdiginiń 30 jyldyǵyna oraı uıymdastyrylyp otyrǵan bul alamannyń burynǵy aıtystan jóni bólek ekenin jetkizdi.
«Kók týymyz tóbemizde jelbirep turǵaly 30 jyl boldy! Bul 30 jyl – tarıh úshin qasqaǵym sát bolǵanymen, Qazaqstan úshin ǵasyrǵa bergisiz ýaqyt. 30 jyl buryn kartadan áreń tabylatyn Qazaqstan, qazir álem sanasatyn, eldiń bári biletin, osynda kelip kelisim tabatyn, halyqaralyq aıryqsha sharalardyń astanasyna aınalǵan ýaqyt boldy. Bul jyldardyń ishinde Qazaqstan ózinin táýelsizdigin ǵana jarııalap qoıǵan joq, rýhanı, áleýmettik, ekonomıkalyq derbestigin de alyp, qaryshtap damyp kele jatyr. Ony kórgisi kelgen adam kóredi. Qazir Qazaqstannyn halyqaralyq abyroıyna eshkim kúmán keltire almaıdy. Osy 30 jyldyqtyń qarsańynda elimizdiń ár jerinde úlken-úlken sharalar ótip jatyr. Solardyń biri – búgingi «Táýelsizdik – qasterlim, qasıetim» dep atalatyn «Altyn dombyra» aıtysy. Bul aıtysqa bıyl óńirlerde ótken aıtystardyń jeńimpazdaryn jınadyq. Bári de jyr alamandarynda eldiń rýhyn kóterip, basyn biriktirip, jaqsylyqty jyrlap júrgen naǵyz shashasyna shań juqpaǵan júırikter», - degen Júrsin Erman alamanǵa túsetin aqyndardy jeke-jeke tanystyrdy.
El Táýelsizdiginiń 30 jyldyǵyna oraı uıymdastyrylyp otyrǵan alaman aıtysta elimizdiń túkpir-túkpirinen kelgen 22 aıtysker aqyn ózara saıysqa túsýde.
Olardyń arasynda halyqaralyq jáne respýblıkalyq aıtystardyń jeńimpazdary, «Altyn dombyra» ıegerleri Bekarys Shoıbekov, Rústem Qaıyrtaı, Aspanbek Shuǵataev, Jansaıa Mýsına, sonymen qatar aıtys aqtańgerleri Erkebulan Qaınazarov, Serik Qýanǵan, Shuǵaıyp Sezimhan jáne t.b. bar.
Dodada top jaryp, «júzden júırik, myńnan tulpar shyqqan» jeńimpazdar erteńgi aqtyq saıysta anyqtalatyn bolady.
Atalǵan dúbirli dodanyń ádilqazylar alqasyna kórnekti óner qaıratkeri, Qazaqstan jáne KSRO Halyq artısi, Memlekettik syılyqtyń ıegeri – Asanáli Áshimov tóraǵalyq etedi.
Sondaı-aq qazylar quramynda aıtys aqyny, Qazaqstannyń halyq aqyny Ásııa Berkenova, úsh dúrkin «Altyn dombyra» ıegeri Muhtar Nııazov, aıtysker aqyn, Qazaqstannyń eńbek sińirgen qaıratkeri Amanjol Áltaev jáne ózge de óner, qoǵam qaıratkerleri bar.
