Baýyrjan Baıbek: "Birgemiz" qorynan kómek alý úshin 2485 teńge tóleý kerek degen aqparat jalǵan
«Áleýmettik jelilerde «Biz Birgemiz» urany aıasynda telegram-bottar men ártúrli onlaın tólem júıeleri arqyly 50 myń teńgeden taratylyp jatyr eken degen jalǵan aqparat paıda bolǵanyn habarlaımyn. Keıbir azamattar qordyń qaıyrymdylyq kómegin alý úshin 2485 teńge mólsherinde birjolǵy jıyntyq tólem tóleý qajet degen feık habar taratyp jatyr», - dep jazdy Baýyrjan Baıbek Facebook -tegi paraqshasynda.
Onyń habarlaýynsha, bul aqparat shyndyqqa janaspaıdy. Qor qarajatynan beriletin materıaldyq kómek alýshylarǵa ekinshi deńgeıdegi bankter arqyly jeke tulǵanyń kartochkasyna nemese aǵymdaǵy esepshotyna aýdarý tásilimen beriledi.
«Bul rette qandaı da bir qujat usyný nemese salyq tóleý talap etilmeıdi. Sonymen qatar bankter eshqandaı komıssııa almaıdy, eger alýshynyń bank aldynda nesıesi boıynsha qaryzy bolsa da, bul qarajat osy qaryzdy óteý úshin ustalmaıdy. Ózderińiz biletindeı, Elbasynyń bastamasymen qurylǵan «Birgemiz» qory alǵashqy kúnnen bastap 550 myńnan astam qazaqstandyq otbasyǵa ataýly kómek kórsetti. Sondaı-aq koronavırýspen kúreske jumyldyrylǵan 2 myńnan astam medıtsına qyzmetkeri de 50 myń teńgeden aldy. «Jas Otan» belsendileri 300 myńdaı otbasyǵa azyq-túlik sebetterin jetkizip berdi. Sonymen qatar Elbasy Nursultan Nazarbaevtyń tapsyrmasy boıynsha Maqtaaral aýdanyndaǵy sý basýdan zardap shekken Dostyq aýylynyń turǵyndaryna arnap jańa úıler salýǵa qordan 340 mıllıon teńge bólindi», - deıdi ol.
Baýyrjan Baıbek «Birgemiz» qory ashyq jáne esep berý qaǵıdattary negizinde halyqtyń áleýmettik álsiz toptaryna qoldaý kórsetý jumystaryn ary qaraı da jalǵastyratynyn jetkizdi.
«Osyndaı kúrdeli kezeńde keıbir teris nıetti jandardyń qıyndyqqa dýshar bolǵan azamattardyń senimimen oınaýy óte ókinishti jáıt. Qor basshylyǵy mundaı alaıaqtyq áreketterdiń jolyn kesý úshin quqyq qorǵaý organdaryna júginedi. Taǵy da qaıtalap aıtqym keledi, tek resmı aqparat kózderine ǵana senińizder!» - deıdi ol.
