Baýyrjan Baıbek basqarmalardyń ataýy ne úshin ózgergenin túsindirdi
«Biz bul ózgeriske «Almaty -2020» strategııalyq baǵdarlamasy qabyldanǵaly beri 3 jyl boıy daıyndaldyq. Birinshi sebep - ozyq tájirıbeler negizindegi tıimdi, ekonomıkalyq sheshim. Biz Memleket basshysy aıtqan jańa ómirge qadam basý úshin muqııat daıyndaldyq», - dedi B.Baıbek.
Onyń aıtýynsha, ákimdik reformasy qalanyń damýyna tyń serpin bermek.
«Biz almatylyqtarmen birge qalany ózgerttik, ózimiz de ózgerdik. Birge bilim alyp, birge kele jatyrmyz. Keıbir sarapshysymaqtar «ekonomıka nasharlap ketti, bıznes qınalyp jatyr» deıdi. Alaıda resmı statıstıka, halyqaralyq reıtıngter dıletanttardyń oıyn joqqa shyǵarady. Máselen, Almatynyń damýy boıynsha Elbasy 2 jyl buryn ShOB-tyń qala ekonomıkasyndaǵy úlesin 2020 jylǵa qaraı 40%-ǵa jetkizýdi tapsyrǵan bolatyn. Bul kórsetkishke jyl qorytyndysy boıynsha jetip aldyq. ShOB óniminiń kólemi 21,2%-ǵa, salyq - 9%-ǵa artty», - dedi ákim.
Baýyrjan Baıbek salyq ákimshiliginiń tıimdiligin arttyrý arqasynda salyq kólemi 12%-ǵa, ıaǵnı 1,9 trln teńgege artqan.
Jalpy alǵanda, qalalyq ınfraqurylymnyń damýyna «Almaty-2020» baǵdarlamasy boıynsha sońǵy 3 jylda memleket 450 mlrd teńge ınvestıtsııalady. Qalada ekonomıka 3,9%-ǵa ósken.
«Jańa qurylymnyń qabyldanýy qoǵam talabynan týyp otyr. Birinshi kezekte ekologııanyń jaqsarýy, qaýipsizdikti qamtamasyz etý, adamdarǵa yńǵaıly orta jasaýǵa qajettilik, qalanyń tarıhı kelbetin saqtaý arqyly jańa qala keńistigin qurý. Jańa ataýlardan turǵyndardyń, qalanyń qajettiligine bet burý, globaldy mıssııa anyq baıqalady. Qoǵam, sotsıým, qala, ýrbanıstıka sózderi 9 basqarmanyń ataýynan kórinis taýyp otyr», - dedi ákim.
Aıta ketý kerek, búgin Almatyda birqatar basqarma taratylatyny málim boldy.
