Baýyrjan Baıbek: BAQ - qoǵam ómirin aıqyndaıtyn qýatty ınstıtýt
NUR-SULTAN. QazAqparat - Almatyda álemniń 50 eliniń 600-den astam ókiliniń basyn qosqan XVI Eýrazııalyq forým ótip jatyr, dep habarlaıdy QazAqparat tilshisi.
Forým qatysýshylaryn quttyqtaǵan Almaty ákimi Baýyrjan Baıbek osydan 17 jyl buryn qalada alǵash ret ótken forým búginde bedeldi halyqaralyq dıalog alańyna aınalǵanyn atap ótti. Bul alańda medıa salasynyń kásibı máselelerimen qatar álemdik qoǵamdastyqty alańdatatyn irgeli taqyryptardyń talqylanatyndyǵyn jetkizdi.
«Buqaralyq aqparat quraly - bul tek jýrnalıstik qoǵamdastyqtyń ǵana álemi emes. Bul qazirgi zamanǵy qoǵamnyń ómirin aıqyndaıtyn, tildesýdiń jańa mádenıetin qalyptastyratyn qýatty aqparattyq ınstıtýt. Óz kezeginde Almaty - bul belsendi azamattardyń qalasy jáne joǵary maqsattary bar mundaı aýqymdy forýmdy ótkizý barlyq ýaqytta da azamattardyń qyzyǵýshylyǵyn týdyrady. Sarapshylyq qoǵamdastyqtyń da belsendiligi joǵary», - dedi Baýyrjan Baıbek.
Almaty ákimi turaqty damý kepili memlekettiliktiń myzǵymas qundylyqtarynyń tiregi ekendigin atap ótti. Olardyń qatarynda kez kelgen qoǵamnyń ál-aýqaty úshin negiz bolyp sanalatyn izgilik, ádildik, yntymaqtastyq, bilim men úılesimdilikke umtylys bar.
«Jedeldetilgen transformatsııalyq protsesterimen erekshelenetin qazirgi kezeńde olardyń ózektiligi munan ary da arta túsýde. BAQ barlyq adamzatqa ortaq osynaý qundylyqtardy qoǵamdyq sanaǵa sińirýde jáne taratýda sheshýshi mánge ıe. Búkil álemniń sarapshylary úshin mańyzdy alańǵa aınalǵan Eýrazııalyq medıa forým munan ary damýdyń negizgi baǵyttaryn aıqyndaýǵa, onyń ishinde dıalog pen ózara yntymaqtastyq ıdeıasyn ilgeriletýge óz úlesin qosatyndyǵyna senimdimin», - dedi ol.
Buǵan deıin Qazaqstan Prezıdenti Qasym-Jomart Toqaevtyń XVI Eýrazııalyq medıa forým qatysýshylaryna quttyqtaý joldaǵanyn habarlaǵan edik.
