Baýyrjan Baıbek «Atakent» ornalasqan aýmaqty qala menshigine qaıtarýdy tapsyrdy
ALMATY. QazAqparat - Almaty ákimi Baýyrjan Baıbek jumys sapary barysynda «Atakent» iskerlik baılanys ortalyǵyn aralap kórdi, dep habarlaıdy QazAqparat tilshisi.
Ákimniń aıtýynsha, menshik ıeleri atalǵan aımaqty damytý boıynsha mindettemelerin tolyq atqarmaı otyr.
Osyǵan baılanysty Almaty ákimi tıisti basqarmalarǵa jalǵa berý kelisimin buzý týraly tapsyrma berdi.
«Kezinde «Atakent» aınalasy jasyl jelekke oranyp, munda adamdar otbasymen serýendeýge keletin. Buryn kaskadty sýburqaq bar edi, al qazir onyń bárin asfalttap, kólik turaǵy men bazarǵa aınaldyrǵan. Basqarýshy kompanııa osy aýmaqtty damytý jóninde qalalyqtarǵa úlken ýáde berip edi, alaıda, kórip otyrǵanymyzdaı sońǵy jyldary eshqandaı jumys atqarylmaǵan», - dedi Baýyrjan Baıbek.
Almaty ákimi keshen aınalasyndaǵy asfaltty jerdi azaıtýdy, jasyldandyrýdy, gazondarǵa ornalasqan túrli konstrýktsııalar men qurylystardy alyp tastaýdy, aǵash otyrǵyzýdy, oryndyqtar men ýrnalardy jáne basqalaryn qoıýdy tapsyrdy.
Budan ózge, jaıaý júrginshilerdiń qaýipsizdigin qamtamasyz etý úshin ortalyq kireberistegi kólik turaǵy buzylady. 
Jumys sapary aıasynda Baýyrjan Baıbek Tımırıazev jáne Áýezov kóshelerin abattandyrý boıynsha birqatar tapsyrmalar berdi.
