Baýyrjan Baıbek Almatyny Dýbaıǵa teńedi
ALMATY. QazAqparat - Almaty ákimi Baýyrjan Baıbek qalanyń Іskerlik keńesinde sóz sóılegen kezde Almatyny Dýbaımen salystyrdy, dep habarlady QazAqparat.
«Almaty - óńirlik magnıt, muny jan basyna shaqqandaǵy tabys, saýda, qurylys, qyzmetter, servıs, bank, saqtandyrý qyzmetteri sııaqty kóptegen parametrler boıynsha aıtýǵa tolyq quqymyz bar. Almaty - óńirlik Dýbaı. Ol solaı bolyp qalyptasty», - dedi Baýyrjan Baıbek.
Ákim ekonomıka adam kapıtalynan qalyptasatynyn atap ótti. Onyń aıtýynsha, qazir 86 paıyzy saýda men qyzmet bolatyn jergilikti ekonomıka qurylymyn esepke alyp jumyssyzdardy tómendetý boıynsha arnaıy baǵdarlama ázirlenýde.
Baǵdarlama jumyssyzdar men ózin-ózi jumyspen qamtyǵan qalalyqtardy týrıstik sala men jańa taýashadaǵy servısterge suranysqa ıe mamandyqtarǵa oqytýǵa baǵyttalǵan.
«Búgin «Damý» qorymen biz týrızm, ınnovatsııa jáne taǵam ónerkásibi salasyndaǵy ShOB qoldaýdyń óńirlik baǵdarlamasyn iske asyrý boıynsha memorandýmǵa qol qoıamyz. Osy baǵdarlama aıasynda biz «Startap Almaty» baǵdarlamasyn iske asyrýdy bastaıtynymyzdy habarlaımyz. Onda bólingen qarajattyń kem degende 25 paıyzy «startaptardy» qarjylandyrýǵa baǵyttalǵan», - dedi Baıbek.
