Baýyrjan Baıbek almatylyqtardy Naýryz merekesimen quttyqtady
ALMATY. QazAqparat - Almaty ákimi Baýyrjan Baıbek qala turǵyndary men qonaqtaryn Naýryz merekesimen quttyqtady, dep habarlaıdy QazAqparat tilshisi.
«Barshańyzǵa belgili Keńes kezeńinde Naýryzdy toılaýǵa tyıym salynǵan bolatyn. Tek, 1988 jyly Ult zııalylarynyń bastamasymen sol kezde Mınıstrler keńesiniń tóraǵasy bolyp turǵan Elbasy Nursultan Nazarbaev jan-jaqty qoldap, Naýryz halqymyzben qaıta qaýyshty. Sodan bergi arada áz-Naýryz kómeskilengen ulttyq rýhty qaırady. Salt dástúrimizdi, ulttyq sanany jańǵyrtýǵa qyzmet etti. Taǵdyrdyń talaıymen otanymyzdy meken etken, kúlli etno ókilderiniń dostyǵyn, eldik sezimin, qazaq halqyna degen qurmetin nyǵaıtty. Elbasymyz aıtqandaı, Naýryz barsha jurt tek jaqsylyq kútetin, dostyq pen birliktiń merekesi. Onyń ıdeıalyq mazmuny kólemdi, tárbıelik máni qarapaıym, túsinikti. Ózara qomqyrlyq kórsetip, qol ushyn sozýǵa bastaıtyn Naýryz qaıyrymdylyqtyń, ımandylyqtyń berekesi. Ertede Naýryz kúni aýqatty jandar qaıyrymdylyq jasap, elge kómek qolyn sozǵan. Buqaraǵa tegin as úlestirgen. Aldyńǵy býyn aǵalar jaqsy biletin bul ıgi dástúr qazir birtindep qaıta jańǵyrý ústinde. Byltyr Almatynyń 1000 jyldyq dástúri aıasynda qolǵa alynyp, qanshama kóp balaly januıa qamtylǵan «1000 ıgi is» aktsııasynyń tabysty ótýi qalalyq Qazaqstan halqy Assambleıasy ótkizetin qaıyrymdylyq sharalarynyń dástúrge aınalýy, balalar úılerine jasalatyn kómek kóleminiń jyl saıyn artýy osy aıtylǵannyń aıǵaǵy ispetti», - dedi Baýyrjan Baıbek.
Aıta keteıik, Almatyda bıyl alǵash ret saltanatty sharalar birden eki alańda: «Astana» alańy men Atletter aýylynda ótip jatyr.
«Uly dalanyń Naýryzy» merekelik sharasyna 700-den astam ártis qatysýda.
Merekede «Múshel» atty teatrlandyrylǵan kórinis kórsetilip, qazaqtyń kóneden kele jatqan «Samalyq», «Túlik jyry» atty salt-dástúrli, rıtýaldy án-jyrlary oryndaldy. 
