Baýyrjan Baıbek almatylyqtardy Konstıtýtsııa kúnimen quttyqtady
Abaı atyndaǵy Memlekettik akademııalyq opera jáne balet teatrynda Qazaqstan Respýblıkasynyń Konstıtýtsııa kúnine arnalǵan saltanatty jıyn ótti.
Atalǵan sharaǵa Almaty qalasynyń ákimi Baýyrjan Baıbek, Máslıhat depýtattary, etnomádenı birlestikterdiń, jastar uıymdarynyń ókilderi qatysty.
Shahar basshysy Ata Zańymyz - Konstıtýtsııanyń Qazaqstannyń demokratııalyq memleket retinde qalyptasýynda basty ról atqarǵandyǵyn atap ótti.
«Prezıdentimizdiń salıqaly saıasaty arqasynda elimiz táýelsizdiktiń barlyq jyldary ishinde birlikti tý etip, azamattyq sáıkestik negizinde birtutas ultty qalyptastyrdy. Ózderińiz bilesizder, Elbasynyń Bes ınstıtýtsıonaldy reformasyn keńinen talqylaý barysynda Konstıtýtsııaǵa aýqymdy ózgerister engizildi. Al bul Zańnyń múltiksiz oryndalýyn qamtamasyz etý úshin júıeli sharalar qabyldaýǵa, azamattarǵa negizdelgen memlekettik apparatty qalyptastyrýǵa, memlekettik mańyzdy sheshimderdi qabyldaýǵa azamattyq qoǵamnyń belsendi túrde qatysýyna jáne tıimdi baqylaýdy júzege asyrýǵa múmkindik beredi. Konstıtýtsııalyq reforma zańnamalyq býynnyń oryndaýshylarǵa baqylaýyn kúsheıtti, atqarýshy organdardyń jáne saıası partııalardyń jaýapkershiligin arttyrdy. Reformanyń túpki maqsaty - qarapaıym qazaqstandyqtardyń ómirin túbegeıli jasqartý», - dep atap ótti B.Baıbek.
Almaty ákimi saıası jáne ekonomıkalyq qaıta qurýdyń jáne Konstıtýtsııa áleýetin tıimdi paıdalanýdyń basty maqsaty - sanany jańǵyrtý ekenin qadap turyp aıtty. Elbasy óziniń «Bolashaqqa baǵdar: Rýhanı Jańǵyrý» baǵdarlamalyq maqalasynda: «Osylaısha, biz qaıta túleýdiń aıryqsha mańyzdy eki protsesi - saıası reforma men ekonomıkalyq jańǵyrýdy qolǵa aldyq.Bizdiń maqsatymyz aıqyn, baǵytymyz belgili» degen bolatyn.
Óziniń sózinde Baýyrjan Baıbek qysqa ýaqyttyń ishinde Almatynyń qýatty qarjy ortalyǵyna aınalǵanyn, bıznestiń jedel damyǵanyn, aýqymdy jumys oryndarynyń ashylǵanyn, qala turǵyndarynyń turmys jaǵdaılarynyń jasqarǵanyn aıtty.
Osynyń barlyǵyna Memleket basshysynyń 20 jyl buryn bas qalany Astanaǵa kóshirý jónindegi sheshimi oń yqpal etti. Halyqaralyq tájirıbe myqty saıası ortalyq pen lıberaldy qalany úılestirý aldyńǵy qatarly memleketterdiń turaqty damýyna áser etetinin kórsetti. Mysaly, Vashıngton men Nıý-Iork, Ankara men Stambýl, Berlın men Mıýnhen.
«Qarjy jáne ekonomıkalyq magnıt retinde Almaty elimizdiń saıası ortalyǵy - Astanany tolyqtyra túsýde. Astanany kóshirý kezinde Elbasy «Almaty memleketimizdiń iri qarjy-ekonomıkalyq, ǵylymı, áleýmettik- mádenı ortalyǵy bolyp qala beredi jáne óziniń tartymdylyq mańyzyn eshqashan joımaıdy» degen bolatyn. Biz búgin Elbasy sheshiminiń ómirsheńdigin kórip otyrmyz.Mysaly, Almaty elimiz ekonomıkasynyń besten birin, salyq jáne salyqtyq emes túsimniń úshten birin berýde, barlyq saýda operatsııalarynyń 40%-dan astamyn, jumyspen qamtýdyń 15%- yn qamtamasyz etýde», - dedi B.Baıbek.
Saltanatty jıyn óner ujymdarynyń merekelik kontsertimen aıaqtaldy.