Baýyrjan Baıbek Almaty turǵyndaryna baspana alý jeńildikteri týraly aıtty
ALMATY. QazAqparat - Búgin Almaty ákimi Baýyrjan Baıbek qala aktıvimen kezdesý barysynda Memleket basshysynyń aýqymdy áleýmettik jobalaryn júzege asyrýda megapolıste atqarylatyn jumystar týraly aıtty, dep habarlaıdy QazAqparat tilshisi.
Almaty ákiminiń aıtýynsha, Memleket basshysynyń eldi modernızatsııalaý bastamasy keshendi sıpatta, ári barlyq salalardy qamtıdy.
Mysaly, konstıtýtsııalyq reforma bılik tarmaqtarynyń naqtyly ballansyn belgiledi ári jergilikti ózin - ózi basqarýdyń damýyna jańa serpilis berdi. Elimizde ekonomıkalyq modernızatsııalaý jáne tsıfrlandyrý boıynsha qomaqty jumystar júrip jatyr. Óz kezeginde «Rýhanı jańǵyrý» baǵdarlamasy rýhanılyqtyń, ulttyq sananyń jańarýyn qamtamasyz etti. Olar ashyqtyq, pragmatızm, bilim mádenıeti, básekelestik prıntsıpterine negizdeldi.
«Elbasy jobalary - halyqtyń turmysyn jaqsartýǵa baǵyttalǵan ári naqty, qajetti resýrstarmen negizdelgen baǵdarlamalar. Bes áleýmettik bastama - Prezıdenttiń salıqaly saıasatynyń biri jáne adamǵa degen shynaıy qamqorlyqtyń naqtyly kórinisi. Bizdiń mindetimiz atalǵan tapsyrmalardy jedel oryndaýǵa kirisý jáne árbir almatylyqtyń osynaý aýqymdy áleýmettik jobalardyń oń nátıjesin kórýlerine yqpal etý. Ol úshin bizde barlyq resýrstar bar»,- dedi Baýyrjan Baıbek.
Qala ákimi qoljetimdi baspana salý qala bıliginiń negizgi mindeti ekenin jetkizdi.
Onyń aıtýynsha, 2017 jyly qurylys qarqyny 4 ese ósken. Almatyda kezekte turǵan árbir úshinshi adam páter aldy. 1,9 mln sharshy metr turǵyn úı nemese 16,5 myń jańa páter salyndy. Aıta keterligi, aldaǵy ýaqytta taǵy da 1,5 mln sharshy metr turǵyn úı nemese 17 myńnan astam páter salynady.
Bulardan ózge «Almaty jastary» áleýmettik baǵdarlamasyn oryndaý úshin jergilikti bıýdjetten bıyl 2 mlrd teńge bólingeni taǵy aıtyldy.
Baǵdarlamaǵa qatysatyn jas otbasylar alǵashqy jarnany tólemeı- aq 5% -dyq turǵyn úı nesıesin alady.
Megapolıs basshysy Almatyda 50 myńnan astam stýdenttiń jataqhanaǵa zárý ekenin aıtty. Ótken jyly 2 myń oryndyq 4 jataqhana salynsa, 2020 jylǵa deıin taǵy da 20 jataqhana salý josparlanǵan.
Búginde qalada 27 myńnan astam jas jetkinshek kolledjde tegin bilim alyp jatyr. Elbasy tapsyrmasy boıynsha 2016 jyldan bastap balabaqsha aqysy bıýdjet esebinen 2,5 ese azaıdy.
Turǵyn úı boıynsha 2 myńnan astam qala turǵyny áleýmettik kómek alyp jatyr. Qala ákimdigi kommýnaldyq qyzmet tarıfterin sýbsıdııalaýda. 2015 jyldan tarıfterdi ustap turý úshin jergilikti bıýdjetten 3 mlrd teńgeden astam qarjy bólindi.
Al ınjenerlik jelilerdi modernızatsııalaýǵa 100 mlrd teńge kóleminde qarjy qarastyryldy.
Baýyrjan Baıbek qala aktıvimen kezdesý barysynda jeke sektordyń jyl aıaǵyna deıin tolyq gazdandyrylatynyn, 2021 jyly Almaty aglomeratsııa aýmaǵyndaǵy 4 myń jeke úı gazǵa qosylatynyn jetkizdi. Elbasynyń tapsyrmasy boıynsha JEO-2 gazǵa kóshiriledi, energetıka mınıstrliginiń esebi boıynsha sonyń arqasynda JEO-nyń aýaǵa shyǵaratyn zalaly 30 ese azaıady.
