Baýyrjan Baıbek: Almaty bazarlarynda qylmystyq toptar baryn bilemiz
ASTANA. QazAqparat - OKQ-da baspasóz máslıhatyn ótkizgen Almaty ákimi Baýyrjan Baıbek Almatydaǵy bazarlardyń báriniń jumysy retke keltirilip jatqanyn, 57 bazardyń 30 paıyzynyń jumysy jańa formatqa kóshkenin málim etti, dep habarlaıdy «QazAqparat» HAA tilshisi.
«Qalada 1300 zańsyz dúńgirshekterge demontaj jasaldy. Dál sol mólsherdegi eski úlgidegi bılbordtar aýystyryldy. Ózderińiz suramasańyzdar, dúńgirshekterdiń nemese gúl satatyndardyń 99 paıyzy Sizge saýdadan keıin túbirtek bermeıdi. Bunyń bári kóleńkeli ekonomıka. Sonymen birge, búgingi tańda iri saýda ortalyqtarynda 40 myńǵa jýyq adam jumys isteıdi. Sońǵy 2 jylda ǵana bul saýda ortalyqtarynyń jańartylýyna 200 mlrd teńgelik jeke ınvestıtsııa quıyldy. Halyqaralyq standarttarǵa saı keletin 16 saýda kesheni ashyldy», - deıdi qala ákimi.
Baýyrjan Baıbektiń aıtýynsha, bazarlardan góri iri saýda ortalyqtarynda saýda jasaý áldeqaıda tıimdi.
«Men Sizderge mysal keltireıin, kóptegen adamdar bazarda taýar arzan dep oılaýy múmkin. Biraq, bul olaı emes. Búgingi tańda kóptegen saýda ortalyqtary Siz satyp alatyn kartopty bazardaǵydan arzan baǵada usynady. Ekinshiden, biz bazarlarda sanıtarlyq normalar saqtala bermeıtinin, kóptegen ónimderdiń tońazytqyshta saqtalmaıtynyn, túbirtek te joq ekenin bilemiz. Taýar úshin Siz kúni erteń eshqandaı daý aıta almaısyz. Odan bólek, sońǵy birneshe jylda qansha bazardyń órtengenin bilesiz. Kúni búginge deıin sol órtengen taýarlarynyń aqshasyn qaıtara almaı júrgender bar. Sebebi, taýar saqtandyrylmaǵan. Kamera da, qaýipsizdik te joq. Onda qylmystyq toptar jumys isteıdi. Biz bilemiz. Saýda ortalyqtarynda bundaı bylyqtyń biri joq», - deıdi qala basshysy.
Baspasóz máslıhatynyń «suraq-jaýap» kezeńinde tilshiler qaýymynan Baýyrjan Baıbekke qandaı qylmystyq toptar týraly sóz etilip otyrǵany týraly suraq qoıyldy.
«Árbir bazarda sondaı bolady. Siz bilesiz ǵoı... Qolma-qol aqsha júrgen jerge kóp adamdar qyzyǵady. Mysaly Dúnıejúzilik banktiń málimetiniń 10 jyl burynǵy zertteý jumysynyń nátıjesi boıynsha, Almaty bazarlarynda 1,5 mıllard dollarlyq aınalym bar. 1,5 mıllıard dollar! Qazir 84 mıllard tóleıdi (...) Bazarlardan aqsha bes-alty ese az túsedi. Ol aqsha qaıda ketip jatyr. Men bilmeımin. Siz de bilmeıtin shyǵarsyz. Sondyqtan sol jaqta (bazarlarda - avt) qolma-qol aqsha júrgen kezde ártúrli toptar bolady. «Kómektesemiz, qorǵaımyz» dep keledi. Biz quqyq qorǵaý organdarymen birlese otyryp, árbir bazarmen jumys isteımiz. Onyń sany (bazarlardyń - avt) bizde - 57. Qazirgi tańda olardyń 30 paıyzyn biz jańa formatqa kóshirdik. Naqty bazardy men aıtpaımyn. Bizde málimet bar. Ol boıynsha biz zań sheńberinde jumys atqaryp jatyrmyz», - deıdi Baýyrjan Baıbek.
