Baýyrjan Baıbek «Alash praıd» ókilderine sáttilik tileý úshin ashyq jattyǵýǵa bardy
ALMATY. QazAqparat - Búgin Almaty qalasynyń «Astana» alańynda «Alash praıdtyń» ókili Arman Ospanov ashyq jattyǵý ótkizdi, dep habarlaıdy QazAqparat tilshisi.
«ALASH PRIDE FC» promoýterlik kompanııasynyń ókili, Qazaqstannyń eń úzdik faıteri Arman Ospanov («Suńqar») bul ashyq jattyǵýyn 9 qyrkúıek kúni «Almaty Arena» sport saraıynda ótetin halyqaralyq ALASH PRIDE - ASV týrnıri aldynda jankúıerlerine arnap ótkizdi.
Almaty qalasynyń ákimi Baýyrjan Baıbek jigitterge sáttilik tileý úshin ashyq jattyǵý ótip jatqan alańǵa arnaıy bardy.
«Qala kúni qarsańynda 70-ten astam túrli shara ótkizip jatyrmyz. Elbasynyń qoldaýymen «Astana» alańy jańardy. Úlken jumystar atqaryldy. Abaı atyndaǵy Opera jáne balet teatry mańaıy eýropalyq stılde jasalyp jatyr. Jibek joly kóshesi jańadan ashylatyn bolady», - dedi qala ákimi.
Ashyq jattyǵýdan keıin jankúıerlerge qoltańba úlestirilip, fotosessııa jasaldy.
«ALASH PRIDE - ASV» - osy kúzdegi eń eleýli aralas jekpe-jek oqıǵasy bolmaq. Atalǵan MMA týrnıri aıasynda 15 jup aıqasqa túsedi. Olar Qazaqstan, Reseı, AQSh, Brazılııa, Lıtva, Rýmynııa jáne Tájikstan syndy elderdiń atyshýly faıterleri.
