Baýyryna salý: Ata-ájesi asyrap alǵan balalar problemasy jaıly fılm túsirildi

ASTANA. QazAqparat - Sergeı Dvortsevoıdyń áıgili «Qyzǵaldaq» fılmindegi (2008 jylǵy Kann kınofestıvalindegi «Erekshe kózqaras» baıqaýynyń bas júlde ıegeri) basty rólimen tanylǵan Ashat Kýchınchırekov rejısser retindegi debıýttik fılminiń túsirilimin aıaqtady, dep habarlaıdy QazAqparat.

«Baýyryna salý» fılmi ájesiniń qolynda ósken jetkinshektiń oqıǵasyn baıandaıdy.

Ájesi qaıtys bolǵannan keıin ol ata-anasyna oralýǵa jáne ózi bóten sanaıtyn adamdarmen jańa ortada qarym-qatynas qurýǵa májbúr bolady.

«Bul - ishinara meniń jeke ómirimnen alynǵan oqıǵa. Men de ájemniń qolynda óstim, meni tárbıelegen sol kisi. Osy máseleni jiti zerttedim. Mundaǵy basty nárse – ata-ana men balanyń qarym-qatynasy. Ata-ájesiniń qolynda ósken kez kelgen bala óz ata-anasyn «áke» ne «ana» dep atamaıdy. Nege olaı? Ár sondaı balanyń ishinde «meni tastap ketken» degen renish bar. Fılmniń dramatýrgııasy, eski otbasynan aıyrylǵannan keıin áli de jańa otbasy tabý múmkindigi bar ekenin kórermenge jetkizý», - deıdi rejısser.

Jetkinshektiń rólin Ersultan Ermanov somdap shyqty. Bul - onyń kınodaǵy debıýti.

Jas ártis 2000 bala qatysqan keń aýqymdy onlaın kastıngten ótken. Onyń ákesiniń rólinde kásibı akter Aıdos Áýesbaev oınaıdy.

Kýchınchırekovtiń ózi bul jobada rejısser, stsenarıst jáne prodıýser retinde jumys istedi. Túsirilim ótken jyldyń jazynda ótti.

Negizgi lokatsııalar – Almaty oblysyndaǵy Quıǵan jáne Tuıyq aýyldary. Qoıýshy-operatory Janarbek Eleýbek.

Avtorlar fılmniń tusaýkeserin iri halyqaralyq kınofestıvalderde ótkizip, otandyq prokatqa kelesi jyly shyǵýdy josparlap otyr.

Rejısserdiń aıtýynsha, bul týyndy – qazaq halqynyń salt-dástúrine degen qurmet.

«Bul kartına bárine qyzyq. Tusaýkeseri Kann festıvalinde bolsa eken deımin, ony frantsýzdarmen talqylap jatyrmyz. Sıngapýrdan prodıýserler habarlasty, Germanııadan jazdy, bizdiń saltymyzdyń biregeıligi men tarıhymyz bárine qyzyq. Ózderi solaı aıtady. Ár ulttyń salt-dástúri bar, biraq ýaqyt ete kele olar ózgeriske ushyrap, keıbiri tipti joǵalyp ketken, ýaqyt bárin ózgertti. Al bizdiń bul saltymyz saqtalyp qaldy. Qazir balalar áli de ata-ájesiniń qolynda ósedi. Mysaly meniń kórshilerim Astanaǵa jumysqa ketip, balalaryn ata-analaryna qaldyrdy. Balalaryn atasy men ájesine tárbıeleýge beretin óte baı adamdar da bar. Bul dástúrdiń osy kúnge deıin saqtalýy tańqalarlyq», - deıdi Kýchınchırekov.

«Baýyryna salý» fılmi QR Mádenıet jáne sport mınıstrliginiń tapsyrysy boıynsha Ulttyq kınony qoldaý memlekettik ortalyǵynyń kómegimen túsirilgen.

Foto: heblackandblue.com