Baýyryn aýystyrǵan taldyqorǵandyq kelinshek depýtattardan kómek surady
TALDYQORǴAN.QazAqparat - QR Parlamenti Májilisiniń depýtattary Serik Sápıev pen Marat Bopazovtan taldyqorǵandyq Áıgerim Begaly kómek surady. Shaǵymdanýshynyń aıtýynsha, oǵan byltyr eki jylǵa birinshi toptaǵy múgedektik taǵaıyndalǵan. Biraq belgisiz sebeptermen bir jylyn qysqartyp tastaǵan, dep habarlaıdy QazAqparat tilshisi.
«Men 2015 jyly baýyr tsırrozy dertine shaldyqtym. Byltyr meniń baýyrymdy tolyqtaı alyp tastady. Týysymnyń donor bolýynyń arqasynda bir ólimnen aman qaldym. Maǵan operatsııa jasalǵannan keıin birden eki jylǵa birinshi toptaǵy múgedektik taǵaıyndaldy. Biraq meni kúz aıynda taldyqorǵandaǵy mamandar shaqyryp, birinshi toptaǵy múgedektik tek bir jylǵa beriletinin aıtty. Tipti qolymdaǵy anyqtamany qalammen syzyp bir jylyn qysqartyp, qaıtaryp berdi. Endi maǵan birinshi toptaǵy múgedektik tek bıylǵy jyldyń mamyr aıyna deıin ǵana beriledi», - deıdi Áıgerim Begaly.
Jábirlenýshiniń aıtýynsha, ol alatyn járdemaqy onyń dári-dármeginen aspaıdy. 31 jastaǵy kelinshek múgedektikti taǵaıyndaǵan kezde mamandar qaıda qaraǵan dep ashýlanyp otyr. Endi onyń bar úmiti halyq qalaýlylarynda. Taldyqorǵandyqtyń shaǵymyn tolyqtaı tyńdaǵan Serik Sápıev pen Marat Bopazov máseleni anyqtaýǵa ýáde berdi.
Aıta ketý kerek, Taldyqorǵandaǵy «Nur Otan» partııasynyń ǵımaratynda májilis depýtattary qoǵamdyq qabyldaý júrgizgen bolatyn.
