Baýyryn aýystyrǵan áıel ekinshi ret bosandy
ALMATY. QazAqparat - Almaty dárigerleri baýyryn aýystyrǵan Ásem Sahandy ekinshi ret aman-esen bosandyryp aldy, dep habarlaıdy QazAqparat tilshisi.
Osydan birneshe jyl buryn 24 jastaǵy áıelge dárigerler baýyr tsırrozy degen qorqynyshty dıagnoz qoıǵan.
Uzaqqa sozylǵan aýrýdan soń dárigerler onyń baýyryn aýystyrýǵa sheshim qabyldady.
2015 jyly sáýirde A.Syzǵanov atyndaǵy Ulttyq ǵylymı hırýrgııa ortalyǵynda ortalyq mamandary áıeldiń baýyryn aýystyrdy.
Ásemniń ómiri otadan soń kúrt ózgerdi. Dárigerler oǵan ekinshi ómir syılady desek te bolady.
Kóp uzamaı kelinshek júkti bolyp, 2016 jyldyń jeltoqsanynda tuńǵyshyn bosandy.
Arada 1 jyldan asqanda kóktemde kelinshek dárigerlerge taǵy da júkti ekendigin habarlaǵan. Sodan beri kelinshek dárigerlerdiń jiti baqylaýynda bolǵan.
№17 emhananyń dárigerleri eki júktilik kezinde de úlken táýekelderge bas tigip, Ásemdi aman-esen bosandyrýǵa baryn saldy.
«Men eresek adammyn, árbir júktiligim meniń densaýlyǵym úshin asa qaýipti bolǵanyn túsindim. Eń aldymen osy emhananyń dárigerleriniń kásibı biliktiligine sendim. Apta saıyn analız tapsyrdym. Olar menen ary qobaljýda boldy. Osy kisilerdiń arqasynda ekinshi ret ana atandym. Aıgúl Esentaıqyzy, Vıktor Edýardovıch, Gýlıara Qusaıynqyzyna alǵysym sheksiz» - dedi Ásem.
№17 qalalyq emhananyń bas dárigeriniń orynbasary Vıktor Kım baýyry jaqynda aýystyrylǵan adamnyń bala kóterip, bosanǵanyn erekshe jaǵdaı dep baǵalady.
«Ásem birinshi ret 2016 jyly bosanǵan. Onyń aldynda 1 jyl buryn ǵana baýyry aýysqan bolatyn. Bul bizdiń tájirıbemizdegi birinshi jaǵdaı bolatyn. Bul jerde óte úlken qaýip boldy. Baýyr qantalaýy, ıshemııa bolýy múmkin edi. Tipti ota jasalǵanyna 1 jyl ǵana bolǵan baýyr kez kelgen ýaqytta aǵzaǵa sińispeı qalýy, balada juqpaly aýrý týyndaýy múmkin edi. Ásemdi baqylaýǵa transplantolog, gastroenterolog, gepatolog, ımmýnolog, ınfektsıonıst mamandardy jumyldyrdyq. Kóktemde taǵy da júkti ekenin bilgende, árıne qarsy boldyq. Kesar tiliginen soń nebári 1,5 jyl ótken. Bul bala úshin de, anasy úshin de úlken qaýip boldy», - dedi Vıktor Kım.
Qazir anasy men balasynyń densaýlyǵy qalypty. Otbasy náresteni asyǵa kútip otyr. Juma kúni kelinshek perzenthanadan shyǵady.
