Baýyrsaq-fest: petropavldyqtar Naýryz meıramynda baýyrsaq jeýden jarysady

PETROPAVL. QazAqparat – Petropavlda Naýryz meıramyna oraılastyrylǵan buqaralyq toılaý baǵdarlamasy úsh kúnge shaqtalǵan. Mereke kópqabatty úılerdiń aýlalarynda da uıymdastyrylmaq, dep habarlaıdy QazAqparat tilshisi.

Petropavl qalalyq ákimdigi baspasóz qyzmetiniń málimetinshe, Naýryz meıramyn atap ótý 21 naýryz kúni saǵat 12:00-de ortalyq alańdaǵy «Armysyń, áz Naýryz!» kontserttik baǵdarlamasynan bastalady. Bul kúni qala halqy men qonaqtary ulttyq sport oıyndaryna qatysyp, «Qolóner – syrly óner» atty qolónershilerdiń jármeńkesin tamashalaı alady.

Merekelik is-sharalar halyq kóp jınalatyn oryndarda da uıymdastyrylmaq. Máselen, 19-shaǵyn aýdandaǵy «Sıtı-moll» saýda ortalyǵynyń janynda «Naýryz merekem – Naýryz berekem» atty kontserttik baǵdarlama ótedi.

«Jumysshy» kentinde, «Bylǵary zaýyty» shaǵyn aýdanynda Naýryz merekesi osy kúni mektepterdiń janynda sán-saltanatymen merekelenedi.

Negizgi merekelik baǵdarlama 22 naýryzǵa josparlanǵan. Bul kúni teatrlandyrylǵan kontserttik baǵdarlama ortalyq alańda saǵat 11:00-de bastalmaq.

«Uly dalanyń ulttyq oıyndary» sporttyq oıyndary uıymdastyrylyp, qolónershiler óz buıymdaryn kórermen nazaryna usynady.

Merekeniń ajaryn Baýyrsaq-fest asha túspek. Bul kúni turǵyndar baýyrsaqtyń túr-túriniń dámin tata alady. Sondaı-aq, baýyrsaq jeýden jarysqa túsedi.

Balalar da umyt qalmaǵan, olar úshin túrli saıystar, vıktorınalar uıymdastyrylmaq. «Bereke» shaǵyn aýdanynyń turǵyndary úshin №25 mekteptiń janynda merekelik is-shara ótedi. Al, tústen keıin ortalyq alańda «Saǵyndyrǵan ánder-aı» retro-kontserti josparlanǵan.

23 naýryzda ortalyq alańǵa jınalǵan halyq «Ulystyń uly kúni – Naýryz» baǵdarlamasyn tamashalaı alady.