Baým toǵaıynda abattandyrý jumystary aıasynda birde-bir aǵash kesilmeıdi

ASTANA. KAZINFORM — Almaty qalasynyń Ekologııa jáne qorshaǵan orta basqarmasyna qarasty «Medeý» memlekettik óńirlik tabıǵı saıabaǵy Baým toǵaıynda 104 429 aǵash jáne 5081 buta bar ekenin habarlady.

Vedomstvo atap ótkendeı, olardyń barlyǵy memlekettik orman qory sanatyna jatady jáne erekshe qorǵalatyn tabıǵı aýmaqtyń bir bóligi bolyp sanalady.

— Qazaq ulttyq agrarlyq zertteý ýnıversıteti men QR AShM Orman sharýashylyǵy ǵylymı-ınnovatsııalyq ınstıtýty júrgizgen túgendeý derekterine sáıkes, saý ekpeler — 55%, álsiregen — 23%, ósimi tejelgen — 12%, qýraý bastaǵandar — 8%, qýrap bitken jáne apatty jaǵdaıdaǵysy — árqaısysy 1%. Osylaısha, apatty jaǵdaıdaǵy aǵashtardyń úlesi jalpy sanynyń 9%-dan sál ǵana asady. Bul BAQ-ta buryn taralǵan «48% aǵash kesiledi» degen aqparatty joqqa shyǵarady, — dep túsindirdi Almaty qalasy ákiminiń kommýnıkatsııa jáne BAQ-pen jumys boıynsha keńesshisi Ilzat Akchýrın.

Sonymen qatar 2026 jyly aýmaqty abattandyrý aıasynda toǵaıdyń jasyl qoryn nyǵaıtý jáne tabıǵı shyǵyndardy óteý úshin myńnan astam jańa aǵash otyrǵyzý baǵdarlamasy iske asyrylady. Aǵashtardy sanıtarlyq saýyqtyrý — bul aýrý, qýrap qalǵan jáne zaqymdanǵan butaqtardy kesý, zııankester men aýrýlarǵa qarsy kúres boıynsha keshendi is-shara. Negizgi ádisteri: sanıtarlyq maqsatta kesý, ekpelerdi óńdeý jáne aǵash dińiniń aınalasyn aldyn alý tazalaý. Bul sharalar aǵashtardyń saýlyǵyn, pishinin jáne uzaq tirshilik etýdi saqtaýǵa baǵyttalǵan.

— Toǵaıdaǵy jumystar tabıǵı ortaǵa barynsha az aralasý qaǵıdatymen atqarylady. Abattandyrýda tsement-beton buıymdaryn qoldanbaı, ekologııalyq materıaldar paıdalanylady. Ekologııalyq júrginshi jolaqtary men energoúnemdegish jaryqtandyrý ornatylady, sondaı-aq kelýshilerdiń qaýipsizdigin qamtamasyz etý úshin polıtsııa beketteri men beınebaqylaý júıeleri qarastyrylady, — dedi Ilzat Akchýrın.

Toǵaıdy qalpyna keltirý jumystary qatar júrgizilip jatyr. 2023 jyly eriktiler Sıvers almasy men japyraqty tuqymdardyń 1430 kóshetin, 2024 jyly emen, shyrsha jáne órik aǵashtarynyń 720 kóshetin otyrǵyzdy.

— Jumys eriktiler men demeýshiler esebinen, bıýdjet qarajatyn tartpaı júzege asyrylýda. Osylaısha, Baým toǵaıyndaǵy barlyq is-shara tek biregeı tabıǵı aýmaqty saqtaý, saýyqtyrý jáne qalpyna keltirýge baǵyttalǵan. Maqsat — toǵaıdyń Almaty turǵyndarynyń súıikti demalys orny ári qalanyń jasyl nyshany bolyp qala berýin qamtamasyz etý. Qala turǵyndary men BAQ ókilderin tek resmı ári tekserilgen derekkózderge — Ekologııa jáne qorshaǵan orta basqarmasynyń málimetterine, «Medeý» memlekettik óńirlik tabıǵı saıabaǵynyń aqparaty jáne jobaǵa qatysýshy ǵylymı ınstıtýttardyń derekterine súıenýlerińizdi suraımyz, — dep eskertti ol.

Budan buryn qaladaǵy qurylys kompanııalarynyń biri Baým atyndaǵy toǵaıdy abattandyrý jobasyn qolǵa alyp, oǵan 4,7 mlrd teńge bólgeni anyqtaldy.