Baýkespe urylar jazadan jaltarýdyń arnaıy qoryn quryp aldy - Nyǵmatýlın
ASTANA. QazAqparat - Búgin QR Parlamenti Májilisinde qylmystyq-protsestik zańnamany odan ári jańǵyrtý taqyrybynda ótip jatqan parlamenttik tyńdaýda Májilis tóraǵasy Nurlan Nyǵmatýlın «tatýlasý» ınstıtýtyn paıdalaný kezindegi kemshilikterdi atady, dep habarlaıdy QazAqparat.
«Jábir kórýshimen tatýlasý ınstıtýtyn paıdalaný boıynsha dıfferentsııalanǵan qadamdy qarastyrǵan jón bolar. Bul turǵyda neni aıtpaqpyz? Qazirgi kezdegi jaǵdaı boıynsha beınelep aıtatyn bolsaq, eger de ury bir mıllıon teńgeden aspaıtyn somaǵa urlyq jasap ustalyp qalsa, ol jábirlenýshimen tatýlasyp, shyǵynnyń ornyn toltyra alady. Osyǵan baılanysty jazadan bosatylyp, jaýapkershilikke tartylmaıdy. Múmkin bul adamgershilikke jatatyn qadam shyǵar jáne durys ta bolar, alaıda, eger ol taǵy da ustalsa, osy jolmen jaýapkershilikten jaltarýǵa eshteńe de kedergi emes. Ol úshin eń bastysy urlanǵan zat somasy mıllıon teńge kólemindegi shekten aspasa boldy. Óıtkeni, mıllıonnan assa, bul jaǵdaı aýyr qylmys retinde qaralyp, osy rette tatýlasý múmkin emes»,-dedi N. Nyǵmatýlın.
Onyń sózine qaraǵanda, búginde Qazaqstanda joǵaryda atalǵan keste boıynsha urlyq úshin jaýapkershilikten ketý qylmystyq bıznestiń bir bóligine aınalyp otyr.
«Quqyq qorǵaý organdaryndaǵy tájirıbe júzinde qyzmet etip júrgenderdiń málimetteri boıynsha atalǵan másele boıynsha arnaıy qylmystyq qor da qurylǵan eken. ıAǵnı, osy qordan jábirlenýshilerge keltirilgen zalaldyń orny toltyrylǵannan keıin, ury bostandyqta qalyp, osy kásibin jalǵastyra beredi. Birneshe márte taǵy da ustalady, biraq ta oǵan deıin bostandyqta qalýyna járdemshi qylmystyq qordy toltyryp úlgeredi»,-dep naqtylady Májilis tóraǵasy.
Osy oraıda ol krımınaldyq statıstıkaǵa súıene otyryp, urlyq jasaý eń kóp taraǵan qylmys túri ekenin atap ótti.
