Baýkeńniń shyǵarmalary jas urpaqty otansúıgishtikke tárbıeleı beretindigine senimdimin - N.Qapalbekuly
ALMATY. Qańtardyń 19-y. QazAqparat / Ádilet Musahaev / - «Biz B.Momyshulynyń 100 jyldyǵyna kórme ótkizýge budan bir jyl buryn ázirlene bastadyq»,
deıdi Respýblıkalyq kitap murajaıynyń dırektory Naǵashybek Qapalbekuly QazAqparat tilshisine bergen suhbatta.
Dırektordyń aıtýynsha, murajaı qyzmetkerleri B.Momyshulynyń týǵan jeri Jambyl oblysynyń Jýaly aýdanyna barǵan, sonymen qatar B.Momyshuly atyndaǵy qorda, Taraz qalasyndaǵy Baýyrjantaný ortalyǵynda bolyp kóptegen shyǵarmalaryn jınaqtaǵan. Sondaı-aq batyrdyń kóp tomdyqtaryn shyǵaryp jatqan «Óner» baspasy men Ortalyq ulttyq kitaphanadan, Ǵylym akademııasynyń qoljazba qorynan jáne basqa da oǵan qatysty dúnıelerdiń bárin jınaqtap, suryptap-iriktep sonyń negizgilerin búgingi kórmege qoıǵan. «B.Momyshuly san qyrly: ol batyr, iri qoǵam qaıratkeri jáne jazýshy. Biz kitap murajaıynda qyzmet etip jatqandyqtan, onyń alǵashqy kitaptarynan kúni búginge deıin shyqqandaryn, esh jerde jarııalanbaǵan qoljazbalaryn, jaqynda shyqqan fotoalbomyn jáne ár jyldary basylǵan dúnıelerin iriktep búgingi kórmege qoıdyq. Baýkeń Halyq batyry bolǵandyqtan, ol jaıly dúnıe júzinde kóptegen kitaptar, estelikter jazyldy. Mysaly «Kýba áserleri», Ázilhan Nurshaıyqovtyń ataqty «Ańyz ben aqıqaty» basqa da kóptegen tuńǵıyq dúnıeler osy kórmeden oryn taýyp otyr. Qazirgi ýaqytta Baýyrjantaný ortalyǵy «Óner» baspasymen birigip Baýkeńniń 30 tomdyǵyn shyǵaryp jatyr. Onyń Máskeýde jáne basqa qalalarda jatqan dúnıeleri bar eken, mine sony jan-jaqty zerttep, shyǵarý ústinde. Baýkeńniń shyǵarmalary áli de bizdiń jas urpaqtarymyzdy otansúıgishtikke tárbıeleı beretindigine senimdimin», deıdi N.Qapalbekuly.
